Ажиллангаа сурах боломжтой Хосмог сургалтын тогтолцоог хэрэгжүүлнэ
Компани, ААН байгууллагуудын мэргэжилтэй хүний нөөцийг бэлтгэх олон улсад туршигдсан үр дүнтэй загвар болох Хосмог сургалтын тогтолцоог хэрэгжүүлэхэд төр, хувийн хэвшил хамтран ажиллах гэж байна.
Боловсрол, шинжлэх ухааны яам, Монголын Үндэсний Худалдаа Аж Үйлдвэрийн Танхимын хамтын ажиллагааны санамж бичгийн хүрээнд Хосмог сургалтын тогтолцооны удирдлага, зохион байгуулалт, сургалт, үнэлгээ, чанарын хэрэгжилтийг хангах зорилготой Менежментийн хороо байгуулагдаж, анхны хурлаа өнөөдөр /2024.05.31/ хийлээ.
Менежментийн хороо нь төр, хувийн хэвшил, олон нийтийн байгууллагын төлөөлөл болох 11 хүний бүрэлдэхүүнтэйгээр үйл ажиллагаагаа явуулах юм. Тодруулбал, МҮЭ-ийн холбоо, Ур чадвар, үйлдвэрлэлийн холбоо, Трансвест Монголиа ХХК, Ньюком групп ХХК, Премиум групп, Боловсрол, шинжлэх ухааны яамны төлөөллүүд багтаж буй юм.
Хурлын үеэр Хосмог сургалтын тогтолцооны талаар МҮХАҮТ-ын Ерөнхийлөгч Д.Энхтүвшин хэлэхдээ “Энэ жилээс БШУЯ-тай хамтраад Хосмог хөтөлбөрийн Менежментийн хороо байгуулаад, туршиж үзэх гэж байна. Шинээр туршиж байгаа учраас аль аль талд нь мэдэхгүй зүйлс олон бий. Тиймээс МҮХАҮТ-аас тууштай дэмжье. Аж ахуйн нэгжүүдээ хүний нөөцөө бэлдэх системд оролцдог болох тал дээр ажиллая гэсэн бодолтой байна. Өндөр хөгжилтэй орнуудын хувьд хүний нөөцийн бодлого чухал зүйл нь байдаг. Энэ асуудлаа ямар нэг төрийн байгууллагад даатгаж, найдахаас илүү аж ахуйн нэгжүүд нь хэрэгцээ шардлагадаа нийцүүлсэн хүний нөөцийг бэлтгэхийн тулд сургалтын тогтолцоонд нь оролцдог систем байдаг. Үүнийг хосмог сургалт гээд байгаа юм. Энэ нь Герман, Австри зэрэг аж үйлдвэр өндөр хөгжсөн орнуудын амжилтын үндэс суурь нь болдог. Бизнесийн төлөөллийн байгууллагуудаараа дамжуулж системийг бий болгодог. Танхим болон бодит ажлын байран дахь сургалт хоёрыг хослуулдаг. Гэхдээ ажлын байран дахь сургалт давамгайлдаг. Энэ явцад аж ахуйн нэгжүүд ямар хүн, ур чадвар хэрэгтэй байгаагаа мэдэрдэг учраас оролцоогоо нэмэгдүүлээд өгөхөөр ажиллах хүчээ хувьд маш хурдан сонгож, хэрэгцээтэй ажлын байранд нь ажиллуулах боломжууд бий болдог” хэмээлээ.
Түүнчлэн БШУЯ-ны Боловсролын нэгдсэн бодлого төлөвлөлтийн газрын дарга П.Оюунаа “Энгийнээр хэлэх юм бол ажиллангаа сурах боломжийг иргэдэд олгосон сургалт. Энэ сургалтыг ирэх хичээлийн жилээс эхлэн туршилт байдлаар, ялангуяа ажил олгогчдын бэлтгэл хангагдсан, сургагч багш нар бэлтгэгдсэн мэргэжлийн чиглэлүүдээр ажил олгогч нартайгаа хамтраад, МҮХАҮТ-тай түншлээд хэрэгжүүлэхээр бэлтгэж байна. МҮХАҮТ голлох үүрэгтэй ажиллана. Суралцагчид цалингаа аваад ажлаа хийнэ. Гэхдээ зэрэгцүүлээд мэргэжил эзэмших боломжтой болно гэсэн үг” гэв.
Трансвест Монголиа ХХК Хосмог сургалтын чиглэлээр мэргэжилтэн бэлтгэх хүний нөөц, сургалтын баазаа бүрдүүлсэн бөгөөд сургалтын төвөө байгуулсан талаар тус компанийн хХүний нөөц, бизнес үйлчилгээ хариуцсан захирал Т.Алтанзул хэлж байв. Өөрөөр хэлбэл, хосмог сургалтын тогтолцоо манай улсын хувьд шинэлэг зүйл учраас энэхүү сургалтыг нэвтрүүлсэн аж ахуйн нэгжүүдээсээ туршлага судалж, үлгэрлэл авч цаашид хамтран ажиллах талаар хурлын үеэр санал солилцов. Эхний ээлжинд эрчим хүч, байгаль орчин, хөдөө аж ахуйн чиглэлээр хосмог мэргэжилтэн бэлтгэхээр ажиллаж байгаагаа мөн энэ үеэр онцоллоо.
