Монгол-Словенийн бизнесийн боломжуудын талаар ярилцлаа
МҮХАҮТ-ын Ерөнхийлөгч Д.Энхтүвшин Бүгд Найрамдах Словени улсын Төрийн нарийн бичгийн дарга хатагтай Санжа Штиглич, Словени улсын Элчин сайд Аленка Сухадольникийг төлөөлөгчдийн хамт хүлээн авч уулзлаа. Энэхүү уулзалтын хүрээнд хоёр улсын бизнесийн салбарын одоогийн нөхцөл байдал, хамтын ажиллагааны боломжуудын талаар харилцан ярилцлаа.
МҮХАҮТ-ын Ерөнхийлөгч Д.Энхтүвшин “Монгол Улс нь уул уурхайн бүтээгдэхүүн, ашигт малтмалаас гадна эм, эмийн ургамал, тэдгээрийг үйлдвэрлэх орц найрлагууд, ноос ноолууран бүтээгдэхүүн, мэдээллийн технологийн салбар, мэргэшсэн хүний нөөц (МСҮТ) зэрэг салбарт хамтран ажиллах сонирхолтой байгаа” гэлээ. Мөн тэрбээр Монгол Улс сэргээгдэх эрчим хүч ялангуяа, нар болон салхин эрчим хүчний нөөц ихтэй учраас Словени улсаас сайн туршлага судлах нь өндөр ач холбогдолтой гэдгийг онцолсон. Тус улсын Төрийн нарийн бичгийн дарга Санжа Штиглич Монгол Улсад Словени улсаас 2 томоохон компани үйл ажиллагаагаа явуулж байгааг дурдаад цаашдаа эмийн үйлдвэрлэл, мэдээллийн технологи, тээвэр логистик, агаарын тээвэр, аялал жуулчлалын салбарт хамтарч ажиллах сонирхолтой байгаа талаар ярив.
Уулзалтын төгсгөлд МҮХАҮТ-ын Ерөнхийлөгч Д.Энхтүвшин Бүгд Найрамдах Словени улсад бизнес аялал хийж, Словенид Монгол Улсын бизнесийн салбарын төлөөллүүдийг оролцуулсан эдийн засгийн хамтын ажиллагааг хөгжүүлэх бизнес форумын ирэх 10 дугаар сард зохион байгуулах төлөвлөгөөтэй байгаагаа илэрхийлсэн юм.
