“ЕВРОПЫН ХОЛБООНЫ ШИНЭЧИЛСЭН ХӨНГӨЛӨЛТИЙН ЕРӨНХИЙ СИСТЕМИЙН ДАВУУ ТАЛ БА ЭКСПОРТЛОГЧДЫН АНХААРАХ АСУУДЛУУД” СЭДЭВТ СУРГАЛТ АМЖИЛТТАЙ ЗОХИОН БАЙГУУЛАГДЛАА
МҮХАҮТ болон Европын Холбоо (ЕХ)-ны Монголын олон улсын худалдааг дэмжих (ITDM) төсөлтэй хамтран “Европын холбооны шинэчилсэн хөнгөлөлтийн ерөнхий системийн давуу тал ба экспортлогчдын анхаарах асуудлууд” сэдэвт сургалтыг 2024 оны 05 дугаар сарын 29-ны өдөр амжилттай зохион байгууллаа.
Сургалтын үеэр МҮХАҮТ-ын Дэд захирал Ц.Магнайбаатар "МҮХАҮТ-аас ЕХ-ны санхүүжилтээр хэрэгжиж буй Монголын Олон улсын худалдааг дэмжих ITDM төсөлтэй хамтран “Европын холбооны шинэчилсэн хөнгөлөлтийн ерөнхий системийн давуу тал ба экспортлогчдын анхаарах асуудлууд” сэдэвт сургалтыг зохион байгуулж байна. Монгол Улсын экспортын бүтцийг өнөөдрийн байдлаар харвал уул уурхайн салбар 91 хувь, уул уурхайн бус салбар 9 хувь, үүний дотор аж үйлдвэр 4 хувь, мал аж ахуйн салбар 4 хувийг бүрдүүлж байна. 2023 онд манай улсаас ЕХ руу 138 сая ам.доллар, ЕХ-оос Монгол Улс 814 сая.ам.долларын бараа бүтээгдэхүүн импортолжээ. Манай улсын эдийн засаг дан ганц уул уурхайн хараат байгаагаас олон томоохон сорилтууд тулгарч, гадаадын шууд хөрөнгө оруулалтыг нэмэгдүүлэх, экспортыг төрөлжүүлэх буюу уул уурхайн бус экспорт, түүний дотор аялал жуулчлал, хөдөө аж ахуйн гаралтай бүтээгдэхүүний экспортыг нэмэгдүүлэх асуудал чухлаар тавигдаж байна" гэлээ. Түүнчлэн бизнес эрхлэгчид гадаад зах зээлд нэвтрэх, олон улсын стандартад нийцсэн бараа бүтээгдэхүүн үйлдвэрлэх, өрсөлдөх чадвараа нэмэгдүүлэхэд олон улсын хууль эрх зүйн зохицуулалт, зах зээлийн талаар судлах, үнэн зөв мэдээлэлтэй болох нь маш чухал болохыг МҮХАҮТ-ын Дэд захирал Ц.Магнайбаатар дурдаад уг сургалт нь шинэчилсэн ХЕС-ийн Монголын экспортлогчдод зориулсан давуу тал, олон улсын худалдааны эрх зүйн зохицуулалт, гарал үүслийн дүрмийн талаар мэдээлэл авч, харилцан санал солилцож, туршлага судлах ач холбогдолтой хэмээн онцоллоо.
Сургалтаар МУИС-ийн Бизнесийн сургуулийн захирал Н.Батнасан “ЕХ-ны Хөнгөлөлтийн Ерөнхий Системийн (GSP+) хүрээнд Монгол Улсад олгож буй өнөөгийн болон ирээдүйн боломжууд”, Олон улсын хөдөлмөрийн байгууллагын Монгол дахь төслийн зохицуулагч А.Лхагвадэмбэрэл “Албадан хөдөлмөрийг устгах, сэргийлэх Европын Холбооны шинэ зохицуулалт”, МҮХАҮТ-ын төсөл хөтөлбөрийн газрын дарга А.Энэрэл “ОУХТ-ийн худалдааны хэрэгслийг ашиглах нь”, ITDM төслөөс “ЕХ-ны Монгол Улсын Олон улсын худалдааг дэмжих төслийн танилцуулга”, МҮХАҮТ-ын Хэрэглэгч үйлчилгээний газрын мэргэжилтэн Р.Ариунтунгалаг “ЕХ-ны шинэчилсэн ХЕС-ийн Худалдааны зохицуулалт ба гарал үүслийн дүрмийг бизнест хэрэглэх нь” сэдвүүдээр танилцуулга мэдээлэл хийв. Дээрх сэдвийн хүрээнд (GSP+)-ийн зохицуулалт нь олон улсын 27 үндсэн конвенцийг соёрхон баталж, тэдгээрийг үр дүнтэй хэрэгжүүлэхээр тусгайлан хүлээх амлалт, үүрэг хариуцлага, МУ-ын экспортын өнөөгийн байдал, хөдөлмөрийн хүрээний суурь зарчим ба эрх, албадан буюу заавал хийлгэх хөдөлмөрийн ОУХБ-ын суурь конвенцууд, ITDM төслийн хүрээнд ногоон тогтвортой хүртээмжтэй хөгжлийг дэмжих, (GSP+)-ийн үр ашгийг бүрэн ашиглах, гадаад худалдааны хууль, гаалийн хууль, дүрэм журам, олон улсын шаардлагад экспортын кластеруудыг хөхүүлэн дэмжих, (GSP+)-ийн давуу тал ба анхаарах асуудлууд, худалдааны бодлого - ДХБ ба ДГБ-ын гишүүний эрх, үүрэг, ДХБ-тай холбогдох хамтын ажиллагаа болон Монгол улсын худалдааны бодлогын ОУ-ын конвенцууд сэдвүүдийг хэрхэн ашиглах, экспорт хийхэд тулгарч буй асуудлын талаар харилцан санал солилцож, шийдлийг хэрхэн олох талаар туршлага хуваалцсан юм. Энэхүү сургалтад МҮХАҮТ, (ЕХ)-ны Монголын олон улсын худалдааг дэмжих (ITDM) төсөл, МУИС-ийн Бизнесийн сургууль, ОУ-ын хөдөлмөрийн байгууллагын Монгол дахь төсөл болон 80 гаруй бизнесийн төлөөлөл оролцлоо.
