Гурвалсан харилцааг дээшлүүлэхэд хамтын ажиллагаа чухал
МҮХАҮТ-ын Ерөнхийлөгч Д.Энхтүвшин Олон улсын хөдөлмөрийн байгууллагын (ОУХБ) Хятад, Монголыг хариуцсан суурин төлөөлөгчийн газрын захирал Чанги Ли, Зүүн, зүүн өмнөд Ази, Номхон далайн бүсийн Ажил олгогчийн ахлах мэргэжилтэн Бромли Уэйд, ОУХБ-ын Монгол дахь Үндэсний зохицуулагч П.Болормаа болон төслийн зохицуулагч А.Лхагвадэмбэрэл, Д.Мөнхтогтох, М.Жавзандулам нарыг 2024 оны 5 сарын 28-ны өдөр хүлээн авч уулзлаа.
Уг уулзалтын үеэр Монгол Улс дахь зохистой хөдөлмөрийг дэмжих, хөдөлмөрийн нөхцөлийг сайжруулах чиглэлээр олон улсын болон үндэсний байгууллагуудын хамтын ажиллагааг нэмэгдүүлэх асуудлаар хэлэлцсэн бөгөөд энэ хүрээнд хөдөлмөрийн үндэсний бодлогыг олон улсын жишигт нийцүүлэх, институциудын чадавхыг нэмэгдүүлэх, ажилтнуудын өмнө тулгарч буй бэрхшээлийг шийдвэрлэх, хөдөлмөр эрхлэлтийн тогтвортой өсөлтийг хангах стратегийн санаачилгуудыг хэрэгжүүлэх тухай ярилцсан юм.
МҮХАҮТ-ын Ерөнхийлөгч Д.Энхтүвшин Монгол Улсын хөдөлмөрийн зах зээл, боловсролын шинэчлэлийг дээшлүүлэх, мөн ажил олгогч, хөдөлмөр эрхлэгч болон Засгийн газрын гурвалсан харилцааг дээшлүүлэхэд хамтын ажиллагаа чухал болохыг онцолсон бол Чанги Ли ОУХБ-аас Монгол Улсад техникийн туслалцаа үзүүлэх, чадавхыг бэхжүүлэх хөтөлбөрөөр дамжуулан дэмжлэг үзүүлэх зорилготой байгаагаа цохон тэмдэглэлээ. Түншлэлийн энэхүү уулзалт нь ОУХБ болон МҮХАҮТ-ын хамтын ажиллагааг бэхжүүлэхэд чухал алхам болж, Монгол Улсад илүү бат бөх, үр ашигтай хөдөлмөрийн орчныг бүрдүүлэх зорилготой.
Мөн 2024 оны 5 сарын 27-ны өдөр ОУХБХ-ны Зүүн, зүүн өмнөд Ази, Номхон далайн бүсийн Ажил олгогчийн ахлах мэргэжилтэн Бромли Уэйд МҮХАҮТ-ын дотоод бүтэц, чиг үүрэгтэй танилцан, Ажил олгогч ба Бизнесийн гишүүнчлэлийн байгууллагуудын (EBMO) олон улсын туршлагыг хуваалцан Монгол Улс дахь зохистой хөдөлмөрийн санаачилга, хамтын ажиллагааг өргөжүүлэх талаар ярилцаж санал солилцсон. Ингэхдээ тухайн байгууллагын үүрэг, чиг үүрэг, зохион байгуулалтын талаар танилцуулж үндэсний болон бүс нутгийн чиг хандлага, шилдэг туршлагыг онцлон санхүүгийн тогтвортой байдлын талаар мэдээлэл хүргэсэн юм.
