Монгол дахь эдийн засаг, худалдааны хамтын ажиллагааны солилцооны уулзалтыг зохион байгууллаа
Шандун мужийн Чиндао хотын намын байнгын хорооны гишүүн, Хятад-ШХАБ-ын орон нутгийн эдийн засаг, худалдааны ХА-ны бүсийн намын дарга Жан Шин Жү тэргүүтэй төлөөлөгчид болон тус мужийн бизнес эрхлэгчдийн танилцуулга уулзалт 2024 оны тавдугаар сарын 13-нд Улаанбаатар хотод болж өнгөрлөө. Энэхүү ажил хэрэгч бизнес уулзалтад тээвэр ложистик, аялал жуулчлал, цахим банкны систем, боловсрол соёл аялал жуулчлалын чиглэлийн Хятадын 20 орчим ААН, 90 гаруй монгол бизнес эрхлэгч оролцож туршлага солилцлоо. Тус хурлыг ШХАБ-ын эдийн засаг, худалдааны хамтын ажиллагааны жишиг бүс, МҮХАҮТ-тай хамтран зохион байгуулсан бөгөөд Танхимын Ерөнхий нарийн бичгийн дарга С.Баясгалан нээлтийн үг хэлж оролцлоо.
Тэрбээр “2024 он Хятад , Монгол хоёр улсын хооронд дипломат харилцаа тогтоосны 75 жилийн ой，Хятад, Монгол хоёр тал иж бүрэн стратегийн түншлэлийн харилцаа тогтоосны 10 жилийн ой тохиож байгаа. МҮХАҮТ нь бизнесийн таатай орчин бүрдүүлэх, бизнес эрхлэгчдийнхээ дуу хоолой болон, тэдний эрх ашгийг илэрхийлэн хамгаалж, дэмжин, урамшуулж ажилладаг. Энэ зорилгын хүрээндээ танхимын бизнес эрхлэгчдийг дэмжих, үйлдвэрлэсэн бараа бүтээгдэхүүнийг дотоод, гадаадын зах зээлд гаргах, өрсөлдөх чадварыг нь дээшлүүлэх зорилгоор БНХАУ-тай хамтран олон форум уулзалт, үзэсгэлэн худалдааг зохион байгуулсаар ирсэн. МҮХАҮТ нь бизнесийн гол төлөөллийн байгууллагын хувьд бизнесийн хууль эрх зүй ба бодлогын орчныг сайжруулахад түлхүү анхаарч, бодлогын өмгөөлөл нөлөөллийн үйл ажиллагааг хүчтэй болгох, төр хувийн хэвшлийн хэлбэр төдий хамтын ажиллагаанаас бодит үр дүнд суурилсан түншлэлд хүрэхээр зорин ажиллаж байна.Танхимаас үзүүлдэг төрөл бүрийн үйлчилгээ, дэмжих арга хэмжээнүүдийн чанар хүртээмжийг дээшлүүлэх замаар аж ахуйн нэгжүүд, түүний дотор жижиг дунд бизнесийг хөгжилд хөтлөхийг зорин гишүүнчлэлийн шинэ бодлогыг барьж байна” гэлээ.
МҮХАҮТ-ын дарга Т.Дүүрэн Шандун мужийн Чиндао хотын намын байнгын хорооны гишүүн, Хятад-ШХАБ-ын орон нутгийн эдийн засаг, худалдааны ХА-ны бүсийн намын дарга Жан Шин Жү тэргүүтэй төлөөлөгчдийг /2024.05.14/ Танхимын байранд хүлээн авч уулзлаа. Уулзалтын үеэр ноён Жан бизнес уулзалтыг идэвх санаачлагатайгаар хамтран зохион байгуулсан МҮХАҮТ-ын хамт олонд талархал илэрхийлж, цаашдын хамтын ажиллагааны боломжуудын талаар ярилцсан юм.
ШХАБ-ын орон нутгийн эдийн засаг, хамтын ажиллагааны дэргэдэх Чиндао хотын “Сувд” олон улсын үзэсгэлэн худалдааны төвд Монголын павилионыг албан ёсоор нээх үйл ажиллагааг ирэх есдүгээр сард зохион байгуулна. Монгол Улстай дан ганц худалдааны чиглэлээр бус боловсрол соёл, аялал жуулчлалын чиглэлээр хамтран ажиллах хүсэлтэй байгаа талаараа Хятадын талаас хурлын үеэр илэрхийллээ.
Уулзалтын төгсгөлд Монгол-Хятад хоёр улсын бизнес эрхлэгчдийн ажил хэрэгч уулзалтуудыг зохион байгуулж, гадаад худалдаатай холбоотой тээвэр ложистик, хил гаалийн зарим хүндрэлтэй асуудлуудыг шийдвэрлэх боломжуудын талаар санал солилцов.
