МҮХАҮТ, МОНГОЛ УЛСЫН ГАЗРЫН ТОСНЫ БҮТЭЭГДЭХҮҮН ИМПОРТЛОГЧДИЙН МЭРГЭЖЛИЙН ХОЛБООТОЙ САНАЛ СОЛИЛЦОХ УУЛЗАЛТ ХИЙЛЭЭ

2024/05/07 2

Газрын тосны бүтээгдэхүүний 70 гаруй хувийг Монгол Улсад импортлож байгаа 40 гаруй аж ахуйн нэгжүүд нэгдэж “Монголын газрын тосны бүтээгдэхүүн импортлогчдын мэргэжлийн холбоо” нэртэй гишүүддээ үйлчилдэг төрийн бус байгууллагыг 2014 оны 05 дугаар сарын 20-ны өдөр үүсгэн байгуулжээ. Одоогийн байдлаар тус холбоо нь 40 гаруй ААН-н гишүүнчлэлтэй үйл ажиллагаа явуулдаг.

Монголын газрын тосны бүтээгдэхүүн импортлогчдын мэргэжлийн холбоо нь Монгол Улсын газрын тосны бүтээгдэхүүний хангамжийг тогтвортой байлгах, нэмэгдүүлэх, бүтээгдэхүүний чанарыг сайжруулах, үнийг бууруулах, бүтээгдэхүүнийг тээвэрлэх, хадгалах нөхцөл, технологийг шинэчлэх, сайжруулах зэргээр гишүүдийнхээ эрх, хууль ёсны ашиг сонирхолыг хамгаалах зорилготой ажилладаг тус холбоотой хамтын ажиллагааг өргөжүүлэхээр МҮХАҮТ-ын Ерөнхийлөгч Д.Энхтүвшин, Холбооны Тэргүүн, Шунхлай ХХК-ийн гүйцэтгэх захирал Ж.Мөнхнаран, Холбооны гүйцэтгэх захирал Л.Ганболд, Ник ХХК-ийн гүйцэтгэх захирал Н.Наранбат, Мон суль ХХК-ийн гүйцэтгэх захирал н.Лхагва нартай санал солилцох уулзалтыг хийлээ.

Монголын газрын тосны бүтээгдэхүүн импортлогчдын мэргэжлийн холбооны Тэргүүн Ж.Мөнхнаран салбарын өнөөгийн байдал болон холбооны үйл ажиллагаа, салбарын мэдээллийг танилцууллаа.

Мөн Ник ХХК-ийн гүйцэтгэх захирал Н.Наранбат "МҮХАҮТ-ын зүгээс салбар холбоодын үйл ажиллагаатай танилцаж байгаад талархаж байна. Холбоо Танхим 2 байгууллага хамтын ажиллагаа маш өргөн хүрээнд ажилласаар ирсэн. Манай компанийн хувьд МҮХАҮТ-ын Экспертизийн газрыг үүсгэн байгуулагдсан цагаас эхлэн өнөөдрийг хүртэл импортоор орж ирж буй газрын тосны хэмжилт тооцооллыг хийж дүгнэлт гарган хамтран ажилласаар ирсэн. Зөвхөн Улаанбаатар хотын хэмжээнд авч үзэхэд жилд дунджаар зөвхөн 4500 гаруй импортын вагон цистерныг ПЕТРОВИС ТРЕЙДИНГ ХХК-ийн агуулах дээр хэмжилт тооцоол хийж дүгнэлт гарган хамтран ажиллаж байна.

Салбарт тулгамдаж буй асуудлыг шийдвэрлэх, хууль эрхзүйн орчныг сайжруулах чиглэлд холбооны зүгээс танхимтай хамтран ажиллах нь маш чухал бөгөөд бүхий л талаар дэмжин ажиллахад бэлэн байна" гэв.

МҮХАҮТ-ын Ерөнхийлөгч Д.Энхтүвшин Худалдаа, аж үйлдвэрийн танхимын тухай хуулийн шинэчилсэн найруулга УИХ-аар орж байгаатай холбогдуулан мэргэжлийн холбоодтой уулзаж танхимын хуулиар дамжуулан төр хувийн хэвшлийн тэнцвэргүй харилцааг багасгах, бизнесийн байгууллагуудад тулгарч байгаа асуудлыг шийдвэрлэх,ТББ-ыг тогтвортой явуулахад дэмжлэг үзүүлэх, салбарын мэргэшсэн мэргэжлийн холбоодтой нэг зорилгын төлөө хамтран ажиллахаа илэрхийллээ.