Аргентин улсын Кордоба мужийн Экспортыг дэмжих агентлагтай цахим уулзалт хийлээ
МҮХАҮТ-ын Дэд захирал Ц.Магнайбаатар Аргентин улсын Кордоба мужийн Экспортыг дэмжих агентлагийн Ерөнхий менежер Роберто Росото болон Кандела Гайдо нартай цахимаар уулзав. Ноён Роберто Росото хэлэхдээ Кордоба мужийн экспортыг дэмжих агентлагийн гол үүрэг нь Аргентины экспортоороо тэргүүлдэг Кордоба мужийн экспортыг дэмжих, нэмэгдүүлэх, худалдааг идэвхжүүлэх юм гэдгийг онцоллоо.
МҮХАҮТ-ын Дэд захирал Ц.Магнайбаатар хэлсэн үгэндээ хоёр орон нь дипломат харилцаа тогтоосноос хойш уламжлалт хамтын ажиллагаатай байсаар ирсэн бөгөөд КОВИД цар тахлаас хойш хоёр орны худалдааны тэнцлийг хангах нь чухал гэдийг дурдлаа.
Хоёр байгууллагын талаарх ерөнхий мэдээлэл солилцох, танилцах уулзалт болж хүнс, ХАА, салбарт илүү хамтран ажиллах боломжтой бөгөөд бизнес эрхлэгчдийг хооронд нь холбох зорилгоор бизнес уулзалтуудыг зохион байгуулж, үзэсгэлэн, яармагаар дамжуулан өөрсдийн бүтээгдэхүүнүүдээ танилцуулах боломжтой гэдэгт санал нэгдсэн.
Тус уулзалтад МҮХАҮТ-ын Аргентин улс дахь төлөөлөгч Э.Минжүүр оролцсон бөгөөд хоёр улс хоорондын эдийн засаг, бизнесийн орчны талаарх мэдээллийг солилцох, худалдааг эрчимжүүлэх, экспорт, импортыг нэмэгдүүлэх, хоёр байгууллагын хамтын ажиллагааг идэвхжүүлэх тал дээр хичээж ажиллахаа хэллээ.
