"Үндэсний Чанарын Чуулган 2019" -ын шилдгүүд тодорлоо

2019/11/13 0

2019 оны 11 сарын 14 өдөр, 15:07 цаг: ҮНДЭСНИЙ ЧАНАРЫН ЧУУЛГАН 2019-ЫН ШИЛДГҮҮД ТОДОРЛОО - Жил бүр уламжлал болон зохион байгуулагддаг Үндэсний Чанарын Чуулган амжилттай зохион байгуулагдлаа. Энэ удаагийн шалгаруулалтад материалаа ирүүлсэн нийт ААН, бүтээгдэхүүн үйлчилгээнээс

Шилдэг үйлчилгээгээр Арьсны Өвчин Судлалын Үндэсний Төвийн "Эмнэлгийн тусламж үйлчилгээ"
Шилдэг бүтээгдэхүүнээр Эко Ноос ХХК-ын "Хонины ноосон барилгын дулаан тусгаарлагч"
Шилдэг байгууллагаар "М Си Эс Интернэшнл" ХХК тус тус шалгарлаа.

Түүнчлэн EU TRAM төслийн нэрэмжит Шилдэг экспортлогч байгууллагаар Милко ХХК шалгарсан байна. Шилдгээр шалгарсан бүтээгдэхүүн, үйлчилгээ болон байгууллагадаа цаашдын ажил үйлст нь өндөр амжилт хүсье.

2019 оны 11 сарын 14 өдөр, 13:23 цаг: "Үндэсний Чанарын Чуулган 2019"-ын илтгэгчид "Чанар амжилтын түлхүүр" сэдвийн дор хэлэлцүүлэг өрнүүлж чуулганы оролцогчид болон хэлэлцүүлгийн модераторын асуултуудад хариулж байна.

2019 оны 11 сарын 14 өдөр, 11:42 цаг: ИННОВАЦИЙН СТРАТЕГИ ХЭРЭГЖҮҮЛСНЭЭР ЖИЛИЙН ОРЛОГОО 38 ХҮРТЭЛХ ХУВИАР ӨСГӨХ БОЛОМЖТОЙ - Та байгууллагынхаа алсын хараанд итгэлтэй байсан ч, юу ажиллаж, юу ажиллахгүй байна вэ ... гэдгээ сайн харж чаддаг байх хэрэгтэй. Хэрвээ одоо байгаа арга аргачлалаар байгууллагынхаа үнэ цэнийг тодорхойлж, ингэж ажиллаж ирсэн, ажиллаад болоод л байна гэсэн сэтгэлзүйтэй байвал та инновацийн өрсөлдөөнөөс өөрийгөө хасагдсанд тооцох хэрэгтэй.

Инновацийг нэвтрүүлэх стратеги байхгүй бол нэвтрүүлэх цаг нь ирсэн байна. Компанийн өрсөлдөх чадварыг эрс нэмэгдүүлснээр хамгийн инновацилаг компани жилийн орлогоо 38 хувиар өсгөх ч боломжтой. Инновацийг нэвтрүүлэх амаргүй ч, нэвтрүүлсэн компаниудын үр ашиг хэмжээлшгүй их байдаг.

"Монгол базальт" ХХК-ийн ерөнхий захирал Л.Ариунболд

2019 оны 11 сарын 14 өдөр, 11:33 цаг: ЧАНАРЫН УДИРДЛАГЫН ТОГТОЛЦОО НЬ ЦААСААР ХЭМЖИГДЭХГҮЙ ҮНЭ ЦЭНЭТЭЙ - Чанарын удирдлагын тогтолцоог бий болгоход маш их цаас хэвлэгдэж, хэнд ч хэрэггүй мэтээр ярьдаг ч цаасны зардлаас илүүтэйгээр байгууллагын ажилтан нэг бүр байгууллагынхаа эрхэм зорилго, алсын харааг мэддэг болж, байгууллагынхаа бүхий л хэсэг болох бүтэц бүрэлдэхүүн, үйл ажиллагааны зорилтыг ойлгож авахад чухал ач холбогдолтой.

Нэг ёсондоо зөвхөн өмнөх ажлаа хийгээд явах биш харьяалагдаж буй газартаа уусахад, итгэл үнэмшлээ нэгтгэхэд түлхэц болдог үнэ цэнэтэй зүйл юм.

Орхон аймгийн НДХ-ийн Дарга Б.Анар

2019 оны 11 сарын 14 өдөр, 10:03 цаг: ДЭЛХИЙН ЧАНАРЫН ӨДӨР "ЧАНАР - АМЖИЛТЫН ТҮЛХҮҮР" УРИАТАЙГААР ЭХЭЛЖ БАЙНА - Өнөөдөр Дэлхийн чанарын өдөр. Улс орнуудын хөгжлийн тэргүүлэх зорилтуудын нэг болох чанартай бүтээгдэхүүн, үйлчилгээг сурталчлах, хамтын үнэ цэнэ бүтээх зорилтоор энэ өдрийг 1989 оноос тэмдэглэж иржээ.

Харин манай улс 17 дахь жилдээ "Үндэсний чанарын чуулган"-ыг зохион байгуулж, чанараар тэргүүлж, дэлхийн чанар стандарт нийцсэн бүтээгдэхүүн, үйлчилгээ, ААН-ийг шалгаруулж Засгийн газрын нэрэмжит "Үндэсний чанарын шагнал" олгож байна.