МҮХАҮТ, МОНГОЛЫН САВ БАГЛАА БООДОЛ ҮЙЛДВЭРЛЭГЧДИЙН НЭГДСЭН ХОЛБООТОЙ ХАМТРАН АЖИЛЛАХ САНАЛ СОЛИЛЦЛОО
Монгол Улсын хэмжээнд сав, баглаа, боодлын чиглэлээр 50 гаруй аж ахуйн нэгж 2000 гаруй хүнийг ажлын байраар хангаж, төрөл бүрийн нийлэг уут, цаасан хайрцаг, хүнсний хуванцар сав, бөглөө, бариул, төрөл бүрийн даавуун болон цаасан уут, даавуун цүнх, тор, хүнд даацын болон даацын бус хэрэглээний мяндсан шуудай, 1 удаагийн хоолны хэрэгсэл, шингэн бүтээгдэхүүний канистер сав, бүх төрлийн шошго зэрэг жилдээ 240 гаруй тэрбум төгрөгийн бүтээгдэхүүн дотооддоо үйлдвэрлэн борлуулж байна.
Сав, баглаа, боодол үйлдвэрлэгчдийн нэгдсэн холбооноос хийсэн тойм судалгаагаар Монгол Улсад жилдээ 550 гаруй тэрбум төгрөгийн сав, баглаа, боодлын хэрэгцээ шаардлага байдгаас 55 орчим хувийг импортоор, 45 гаруй хувийг дотоодын үйлдвэрлэлээр хангаж байна. Тухайлбал, цаасан хайрцагны 90%, гялгар уутны 80%, ундаа усны сав баглааны 87%, даацын шуудайны 96%, бүх төрлийн шошгоны 75%-ийг дотооддоо үйлдвэрлэн нийлүүлж байна. Импортын сав, баглаа, боодлын бүтээгдэхүүний 90 гаруй хувь нь БНХАУ-аас, үлдсэн хувийг ОХУ болон бусад орноос худалдан авч байна.
Салбарын нийт үйлдвэрлэгчдийн 95% нь Улаанбаатар хотод байрлаж, нийт суурилагдсан хүчин чадлынхаа 55 орчим хувийг ашиглан үйл ажиллагаа явуулж байгаа бөгөөд томоохон хүнсний болон хөнгөн үйлдвэрийн бусад салбартай хоршин, кластер хэлбэрээр ажиллавал илүү үр дүн, өгөөжтэй байхаар байна.
Хөнгөн үйлдвэрийн салбарт нийт 3200 гаруй үйлдвэр үйл ажиллагаа явуулж, 44000 гаруй хүнийг ажлын байраар хангаж байгаагаас сав, баглаа боодлын салбарт 2000 буюу 4.5 хувь нь ажиллаж байна.
(Эх сурвалж: ХХААХҮЯ, салбарын мэргэжлийн холбоо, 2022 он)
Сав, баглаа, боодлын салбарт үйл ажиллагаа явуулж байгаа 40 гаруй аж ахуй нэгжийг эгнээндээ нэгтгэн тэдний эрх ашгийг хамгаалах, салбарын өмнө тулгамдаж буй татвар, хууль эрх зүй, хөрөнгө оруулалтын асуудлуудыг төр засагт тавьж шийдвэрлүүлэх, салбарт ажиллагсадын эрх ашгийг хамгаалах чиглэлээр сав баглаа боодлын салбарт үйл ажиллагаа явуулж байсан 3 холбоог нэгтгэж 2013 онд шинэчлэн байгуулсан нь одоогоор салбартаа цор ганц мэргэжлийн холбоо гэгддэг юм. Монголын сав, баглаа, боодол үйлдвэрлэгчдийн нэгдсэн холбоотой хамтын ажиллагааг өргөжүүлэхээр МҮХАҮТ-ын Ерөнхийлөгч Д.Энхтүвшин, Монголын сав баглаа боодол үйлдвэрлэгчдийн холбооны Ерөнхийлөгч, ОБ Пластик ХХК-ийн ерөнхий захирал Ж.Отгонбаяр, тэргүүн Б.Болдбаатар, холбооны гүйцэтгэх захирал Н.Анар, Монлабел ХХК-ийн захирал Н.Батмөнх, Шинэ Гантиг ХХК-ийн захирал Ж.Цэрэннадмид, Мултипак ХХК-ийн захирал Э.Тод-Од нартай санал солилцох уулзалтыг хийлээ.
Холбооны удирдлагын зүгээс холбооны үйл ажиллагаа, цаашдын төлөвлөсөн томоохон ажлуудыг танилцууллаа. Сав, баглаа, боодол үйлдвэрлэгчдийн өрсөлдөх чадварыг дээшлүүлэх, хүнсний зориулалтын бус сав, баглаа, боодлыг хэрэглээнээс халах, орлуулах бүтээгдэхүүн үйлдвэрлэл болон уламжлалт сав, баглаа боодлын үйлдвэрлэлийг дэмжих, Олон нийтэд сав, баглаа боодлын соёл хэрэглээний талаарх мэдлэг, мэдээлэл олгох сургалт сурталчилгааны ажлыг зохион байгуулах, үндэсний үйлдвэрүүдийн бараа бүтээгдэхүүнийг сурталчлах, борлуулалтын сүлжээг нэмэгдүүлэх, салбарын хүний нөөцийг бэлтгэх, чадавхыг нэмэгдүүлэх, сургах, давтан сургах гэх мэт тулгарч буй олон асуудалд анхаарлаа хандуулан ажиллаж байна. Холбооны хувьд тус салбарт тулгамдаж буй асуудлыг шийдвэрлэхэд МҮХАҮТ-тай хамтын ажиллагааг өргөжүүлэн ажиллах хүсэлтэй байгаа бөгөөд МҮХАҮТ-ын Платинум гишүүнээр элссэн талаарх мэдээллийг өглөө.
МҮХАҮТ-ын Ерөнхийлөгч Д.Энхтүвшин Худалдаа, аж үйлдвэрийн танхимын тухай хуулийн шинэчилсэн найруулга УИХ-аар орж байгаатай холбогдуулан мэргэжлийн холбоодтой уулзаж танхимын хуулиар дамжуулан төр, хувийн хэвшлийн тэнцвэргүй харилцааг багасгах, бизнесийн байгууллагуудад тулгарч байгаа асуудлыг шийдвэрлэх, ТББ-ыг тогтвортой явуулахад дэмжлэг үзүүлэх, салбарын мэргэшсэн мэргэжлийн холбоодтой нэг зорилгын төлөө хамтран ажиллахаа илэрхийллээ.
Уулзалтын дагуу ойрын хугацаанд хамтын ажиллагааны санамж бичгийг байгуулахаар тогтлоо.
