CAPITAL LEVEL UP: ӨСӨЛТИЙН ДАРААГИЙН ШАТ сургалт боллоо
“Дэлхийн хөрөнгийн зах зээлийн нийт үнэлгээ 111.8 их наяд ам.доллар, сарын арилжааны мөнгөн дүн 11 их наяд ам.доллар, нийт 54,625 компани биржүүдэд бүртгэлтэй” гэдгийг Таван Богд Капиталын Гүйцэтгэх захирал Г.Мөнх-Эрдэнэ “Глобал тренд хаашаа байна вэ?” илтгэлдээ Монголын Үндэсний Худалдаа Аж Үйлдвэрийн Танхим, Улаанбаатар Үнэт Цаасны Бирж, Apex Capital - Better Investing, Tavan Bogd Capital, TDB Securities SC, Ard Securities хамтран зохион байгуулсан CAPITAL LEVEL UP: ӨСӨЛТИЙН ДАРААГИЙН ШАТ сургалтын үеэр танилцуулсан.
Хөрөнгийн зах зээлээс санхүүжилт татаж бизнесийн өсөлтийн дараагийн шатандаа гарахаар зэхэж буй байгууллагуудад зориулсан уг сургалтаар хөрөнгийн зах зээлд нэвтрэх үр ашигтай санхүүжилтийн хувилбаруудыг танилцуулж холбогдох илтгэлүүдийг олон нийтэд хүргэсэн. Тодруулбал, “Бондын санхүүжилт”-ээр Апекс капитал ҮЦК ХХК-ийн Гүйцэтгэх захирал Б.Лхамдолгор илтгэж, ярилцсан бол ТиДиБи Секьюритис ҮЦК ХХК-ийн Дэд захирал Г.Энхбат “Хувьцааны санхүүжилт”, Улаанбаатар Үнэс Цаасны Бирж ХК-ий Гүйцэтгэх захирал М.Даваажаргал “UBX-ийн боломжууд”-ын талаар хуваалцлаа.
“2024 оны 4-р сар гэхэд 33.4 тэрбум ам.долларын хөрөнгө оруулалтыг компаниуд хөрөнгийн зах зээлээс татсан байна”. Энэ нь хөрөнгийн зах зээл асар том боломж гэдгийг харуулж байгаа юм. Нийт бондын зах зээл 133 их наяд ам.доллартай тэнцдэг. Харин Монгол Улсын нийт зах зээлийн 11 хувийг бондын зах зээл эзэлдэг гэдгийг Апекс капитал ҮЦК ХХК-ийн Гүйцэтгэх захирал Б.Лхамдолгорын “Бондын санхүүжилт” илтгэлээс харж болохоор байлаа.
Манай улсын хувьд нээлттэй болсон эсвэл болох сонирхолтой компаниудын тийм ч их биш. Жишээ нь, Монголоос олон улсын хөрөнгийн зах зээлд хувьцаагаа гаргасан “Монголтой холбоотой нийт 12 компани байгаагаас гол төлөв зэс, нүүрс, алтны компаниуд” байгааг Таван Богд Капиталын Гүйцэтгэх захирал Г.Мөнх-Эрдэнэ ярьсан. Тэрбээр “Гэвч өөрийн хүсэлтээр IPO хийгээгүй эсвэл гадаадын зах зээлд IPO хийсэн. Төрийн өмчийн хувьчлал, Хуулийн шаардлагаар л IPO хийсэн” байгааг тодотгоод нээлттэй компани гэдэг нь зөвхөн IPO-оор хязгаарлагдахгүй ойлголт гэлээ.
