Залуу энтрепренерүүдийг дэмжиж ажиллах талаар санал солилцлоо
Тогтворгүй төрийн шийдвэрүүд, хууль эрх зүйн гэнэтийн өөрчлөлтүүд манай орны эдийн засгийн өсөлтөд сөргөөр нөлөөлдөг томоохон хүчин зүйлсийн нэг болдог. Иймд төрийн хэт оролцоог тэнцвэржүүлэх, хувийн хэвшлээс гарж буй санал, санаачилгуудыг илүү хүртээмжтэйгээр хүргэх, дэмжих шаардлага ихээхэн байгаа талаар МҮХАҮТ болон Европын Сэргээн босголт, хөгжлийн банкны /ЕСБХБ/ төлөөллүүд санал солилцлоо.
Энэ удаагийн уулзалтаар хоёр тал шинэ залуу энтрепренерүүдийг дотоод, гадаадын зах зээлд өрсөлдөх боломжоор хангахын тулд зөвхөн санхүүжилтээр дэмжих бус сургалтуудад хамруулах, чиглүүлэхэд чухал ач холбогдол өгж буйг онцоллоо. ЕСБХБ-ны ЖДБ-ийн Санхүүжилт, Хөгжлийн газрын Төв Ази Монголын бүсийг хариуцсан захирал хатагтай Симоне З. Атанасовски “ЕСБХБ болон МҮХАҮТ хооронд хамтын ажиллагаагаа өргөжүүлэх боломжтой салбар олон бий. Танхимын Ерөнхийлөгч Д.Энхтүвшин, таны онцолж буй санал, санаачилгууд бидний үйл ажиллгааны чиглэлтэй уялдаж байгаад таатай байна. Бид шинэ залуу үеийг дэмжиж, тэднийг бизнест хөл тавихад нь илүү өргөн хүрээнд хандах нь зүйтэй” гэсэн юм.
МҮХАҮТ-ын Ерөнхийлөгч Д.Энхтүвшин ЕСБХБ-ны төлөөлүүдэд МҮХАҮТ-ын Бизнесийн Сэргэлт Үндэсний хөтөлбөрийн хүрээнд хийгдэж буй ажлуудын талаар дурдаад залуу хойч үеийн бизнес эрхлэгчдийг бэлтгэх зорилго бүхий 10 000 залуусыг бизнесийн сургалтад хамруулах санаачилга хэрэгжиж эхэлснийг онцолсон юм. Түүнчлэн Танхимын хуулийн шинэчлэлийг хийснээр төр, хувийн хэвшлийн хамтын ажиллагааг улам үр дүнтэй болгох боломжуудыг дэлгэрүүлж ярилаа.
