“Нээлттэй хувьцаат компани болохын давуу тал, хөрөнгийн зах зээлд үзүүлэх нөлөө” уулзалт, хэлэлцүүлэг боллоо.
Аж ахуйн нэгжүүдэд хөрөнгийн зах зээлд хувьцаа, компанийн бонд гаргахад тулгарч буй асуудал, үүнийг шийдвэрлэх арга зам болон нээлттэй компани болсноор үүсэх давуу тал, ач холбогдол, IPO хийх процесс, дараалал, компанийн засаглалын тогтолцоог үр дүнтэй хэрэгжүүлэхийн ач холбогдол зэрэг цогц мэдээлэл өгөх зорилгоор зохион байгуулагдсан “Нээлттэй хувьцаат компани болохын давуу тал, хөрөнгийн зах зээлд үзүүлэх нөлөө” уулзалт, хэлэлцүүлэгт 150 гаруй аж ахуйн нэгжийн төлөөлөл оролцлоо.
Уг уулзалт, хэлэлцүүлэгт МҮХАҮТ-ын Ерөнхийлөгч Д.Энхтүвшин “Бизнес дэх үе шилжилтийн асуудал”-ын талаар танилцуулсан бол Санхүүгийн зохицуулах хорооны Үнэт цаасны газрын дарга Б.Дөлгөөн “Хөрөнгийн зах зээлийн өнөөгийн нөхцөл байдал болон “ТОП-100” аж ахуйн нэгжийг хөрөнгийн зах зээлд үнэт цаас гаргахад дэмжлэг үзүүлэх бодлого, зохицуулалтын арга хэмжээ”, ХААН Банк ХК-ийн гүйцэтгэх захирал Р.Мөнхтуяа “IPO хийж, нээлттэй компани болсноор гарах үр дүн, ач холбогдол”, Өлзий Энд Ко капитал ҮЦК ХХК-ийн гүйцэтгэх захирал Б.Өлзийбаяр “IPO хийх процесс, дараалал, IPO хийсний дараа авч хэрэгжүүлэх арга хэмжээ” сэдвүүдээр тус тус илтгэл танилцуулсан. Мөн Европын Сэргээн босголт хөгжлийн банкны суурин төлөөлөгч Ханнес Такач “Хөрөнгө оруулагчидтай харилцах харилцаа, анхаарах асуудал”-ыг хөндсөн бол Санхүүгийн зохицуулах хорооны Компанийн засаглал, комплайнсийн хэлтсийн дарга А.Авир “Компанийн засаглалын кодекс, түүний хэрэгжилт”-ийн талаар танилцуулав.
МҮХАҮТ, Улаанбаатар Үнэт Цаасны Бирж ХК, Апекс Капитал ҮЦК, Таванбогд Капитал ҮЦК, ТиДиБи Капитал ҮЦК, Ард Секьюритиз ҮЦК хамтран хөрөнгийн зах зээлээс санхүүжилт татаж бизнесийн өсөлтийн дараагийн шатандаа гарахаар зэхэж буй байгууллагуудад зориулан 4 дүгээр сарын 17-ны өдөр CAPITAL LEVEL UP: ӨСӨЛТИЙН ДАРААГИЙН ШАТ сургалтыг зохион байгуулах талаар нийт оролцогчдод мэдээлэл өгөв.
