МҮХАҮТ, МОНГОЛЫН НООС, НООЛУУРЫН ХОЛБООТОЙ ХАМТРАН АЖИЛЛАХ САНАЛ СОЛИЛЦЛОО
Ноос, ноолуурын салбар нь Монгол Улсын уул уурхайн бус экспортын тэргүүлэх гол салбар. Өнөөдөр тус салбар 10 000 гаруй ажиллагсадтай. Ноолуур боловсруулах салбарт гүн боловсруулах үйлдвэр 17, анхан шатны боловсруулах үйлдвэр 34, сүлжмэлийн жижиг дунд үйлдвэр 68, өрхийн жижиг цех 150-200 үйл ажиллагаа явуулж, угаасан ноолуурыг БНХАУ, самнасан ноолуурыг Итали, Их Британи, БНХАУ, БНСУ, ХБНГУ, нэхмэл сүлжмэл бүтээгдэхүүнийг Америк, Герман, Солонгос, Япон, Бельги, Франц зэрэг 30 гаруй оронд экспортолж байна.
Дэлхийн ноолуурын зах зээл жилд дунджаар 24 мянган тонн ноолуур үйлдвэрлэдэг бөгөөд үүний 50 хувийг (12 мянган тонн) Хятад улс дангаараа хангадаг бол Монгол Улс 40 хувийг (10,5 мянган тонн) нийлүүлдэг. Ноолуур боловсруулах чиглэлээр Итали, Их Британи тэргүүлдэг.
Ноолууран ширхэгт нь байгалиас нано бүтэцтэй учраас дээд зэргийн зөөлөн, хөнгөн, дулаан, уян хатан, бөх бат, амьсгалдаг, агаар шүүдэг, галд тэсвэртэй, байгальд задардаг зэрэг хүний эрүүл мэнд, байгальд ээлтэй үзүүлэлтээрээ ноолууран бүтээгдэхүүн нь хэрэглэгчийн түвшингийн дундаас дээш болон тансаг хэрэглээний бүлгийнхний хэрэгцээт бүтээгдэхүүн болж, өндөр хөгжилтэй орнуудын зах зээлд эрэлттэй хэвээр байна.
Энэ гол салбарын 120 гаруй аж ахуй нэгжийг эгнээндээ нэгтгэн тэдний эрх ашгийг хамгаалах, салбарын өмнө тулгамдаж буй татвар, хууль эрх зүй, хөрөнгө оруулалтын асуудлуудыг төр засагт тавьж шийдвэрлүүлэх, салбарын ажиллах хүчний эрх ашгийг хамгаалах чиглэлээр 1993 онд байгуулагдсан 30 жилийн түүхт Монголын ноос, ноолуурын холбоотой хамтын ажиллагааг өргөжүүлэхээр МҮХАҮТ-ын Ерөнхийлөгч Д.Энхтүвшин, Монголын ноос, ноолуурын холбооны гүйцэтгэх захирал Д.Алтанцэцэг, зөвлөх Г.Ёндонсамбуу нартай санал солилцох уулзалтыг хийлээ.
Монголын ноос ноолуурын холбооны гүйцэтгэх захирал Д.Алтанцэцэг салбарын өнөөгийн байдал болон холбооны үйл ажиллагаа, салбарын бодлогын чиглэлээр сүүлийн үед хийж буй томоохон ажлууд зэргийг танилцууллаа. Тус холбоо нь дэргэдээ салбарын мэргэжилтэй ажилтан бэлтгэх, ажилтнуудын ур чадварын түвшинг тогтоох, мэргэжлийн түвшингээр нь зэрэглэх үнэлгээг хийх баталгаажуулдаг мэргэжлийн сургалтын төв, тохирлын үнэлгээний байгууллага, текстилийн технологийн төв үйл ажиллагаа явуулдаг.
Ноос, ноолуурын холбоо нь тогтвортой ноолуурын салбарын дунд хугацааны зорилтууд, ажлын төлөвлөгөө, оролцогч талуудын үүрэг оролцоог тодорхойлох зорилгоор Монгол Улсын ноолуурын салбарын тогтвортой хөгжлийн замын зураглал 2030 -ийг үндэсний, дотоод түншүүд, оролцогч талуудад зориулан боловсруулсан байна. Тус замын зураглалд тогтвортой арга хэмжээ авах зайлшгүй шаардлагатай халуун цэгүүдийг онцлон тэмдэглэжээ.
Мөн энэхүү уулзалтын хүрээнд гарч буй санал, санаачилгуудыг дэмжиж, хамтарч ажиллахаа илэрхийлэхийн зэрэгцээ “Салбарын хууль эрх зүйн орчныг сайжруулах, бодлогын тогтвортой байдлыг хадгалах, салбарт тулгамдаж буй асуудлыг шийдвэрлэхэд хоёр байгууллагын хамтын ажиллагаа маш чухал бөгөөд бүхий л талаар дэмжин хамтран ажиллахад бэлэн” гэсэн юм.
МҮХАҮТ-ын Ерөнхийлөгч Д.Энхтүвшин Худалдаа, аж үйлдвэрийн танхимын тухай хуулийн шинэчилсэн найруулга УИХ-аар орж байгаатай холбогдуулан мэргэжлийн холбоодтой уулзаж танхимын хуулиар дамжуулан төр хувийн хэвшлийн тэнцвэргүй харилцааг багасгах, бизнесийн байгууллагуудад тулгарч байгаа асуудлыг шийдвэрлэх,ТББ-ыг тогтвортой явуулахад дэмжлэг үзүүлэх, салбарын мэргэшсэн мэргэжлийн холбоодтой нэг зорилгын төлөө хамтран ажиллахаа илэрхийллээ.
Уулзалтын дагуу ойрын хугацаанд хамтын ажиллагааны санамж бичгийг байгуулахаар тогтлоо.
