"Базаар Берлин - 2019" үзэсгэлэнд ноос, ноолуур, арьс ширэн бүтээгдэхүүнээр оролцож байна
ХБНГУ-ын нийслэл Берлин хотноо 2019 оны 11-р сарын 6-10-ны өдрүүдэд зохион байгуулагдаж буй BAZAAR BERLIN 2019 олон улсын үзэсгэлэнд МҮХАҮТ-ын Диамонд гишүүн "Сайнтүмэн" кашмер, "Сувд кашмер" ХХК тэргүүтэй ноос ноолуурын 9 аж ахуйн нэгж, арьс ширэн бүтээгдэхүүн үйлдвэрлэгч "Энхжин сувинер" ХХК бараа бүтээгдэхүүнээ танилцуулан эх орноо сурталчлан оролцож байна.
Тус үзэсгэлэнд МҮХАҮТ нь 5 дахь удаагаа гишүүн байгууллагуудаа зохион байгуулан оролцож экспортын чиг баримжаа олгон, бүтээгдэхүүн хөгжүүлэлт, борлуулалтыг дэмжин ажиллаж байна. Энэ жилийн хувьд МҮХАҮТ болон үзэсгэлэн зохион байгуулагчийн хамтын ажиллагааны хүрээнд Монголын аж ахуйн нэгжүүд үзэсгэлэнгийн танхимын 100м2 талбайд нэгдсэн байдлаар бараа бүтээгдэхүүнээ дэлгэн танилцуулж байгаа юм.
BAZAAR BERLIN үзэсгэлэн нь 1962 оноос хойш зохиогдож байгаа, бүтээгдэхүүний борлуулалтаараа дээгүүрт ордог уламжлалт үзэсгэлэн бөгөөд энэ жил 60 орны 500 гаруй үйлдвэрлэгч оролцож байна.
ХБНГУ-д ажлын айлчлал хийж буй МҮХАҮТ-ын төлөөлөгчид энэхүү үзэсгэлэнгээр зочилж, үзэсгэлэнд оролцогчидтой уулзаж, санал хүсэлтийг нь сонслоо.
Түүнчлэн МҮХАҮТ-ын Ерөнхийлөгч О.Амартүвшин, Ерөнхий нарийн бичгийн дарга Б.Саруул нар "БЕРЛИН БАЗААР" олон улсын үзэсгэлэнгийн Монголыг хариуцсан захирал, хатагтай Ариана Зандертай уулзлаа.
Тэд үзэсгэлэнд оролцогч монгол компаниудын тоог нэмэгдүүлэх, Монгол Улсыг сурталчлах "Дүр төрхийн үзэсгэлэн"-д гарч буй бүтээгдэхүүний төрлийг олшруулах зэргээр хамтын ажиллагааг өргөжүүлэх талаар ярилцав.