Хятадын Олон Улсын Импортын Экспо 2019 Шанхай хотноо нээлтээ хийлээ
БНХАУ-ын Худалдааны яам, Шанхай Хотын Ардын засгийн газар хамтран зохион байгуулж буй 2 дахь удаагийн ХЯТАДЫН ОЛОН УЛСЫН ИМПОРТЫН ЭКСПО 2019 оны 11 дүгээр сарын 5-ны өдөр Шанхай хотын “Үндэсний Үзэсгэлэнгийн Танхим”-д нээлтээ хийлээ.
Тус үзэсгэлэнгийн нээлтэд БНХАУ-ын ерөнхийлөгч Ши Жинпин хүрэлцэн ирж нээлтийн үг хэлэв. “Үндэсний Үзэсгэлэнгийн Танхим” нь нийт 500.000м2 талбайг эзэлдэг одоогийн байдлаар Дэлхийд хамгийн томд тооцогдож буй үзэсгэлэнгийн цогц байгууламж юм. ЭКСПО нь 1-8 дугаар танхимд дэлгэгдэх бөгөөд доорх салбараас бүрдэнэ. Үүнд:Ухаалаг, өндөр зэрэглэлийн тоног төхөөрөмж, автомашин, шинэ дэвшилтэт технологи, инноваци, хувцас, өргөн хэрэглээний бараа бүтээгдэхүүн, хүнсний болон хөдөө аж ахуйн бүтээгдэхүүн, соёл боловсрол, аялал жуулчлал, эмнэлэгийн тоног төхөөрөмж, эмийн үйлдвэрлэл, Олон улсын дүр төрхийн хэсэг зэрэг чиглэлээр явагдана. Энэхүү үзэсгэлэн нь 11 дүгээр сарын 5-20-ны өдрүүдэд үргэлжлэх бөгөөд энэ удаагийн ЭКСПО-д нийт 150 орны 3000 гаруй ААН оролцож байгаа юм. Мөн олон улсын дүр төрхийн танхимд нийт 64 улс тухайн улсын тусгай засалттай талбайд оролцож байна.
Монгол Улс нь энэ жил тус ЭКСПО-д анх удаа оролцож байгаа бөгөөд 136м2 тусгай засалттай талбайд Монголын аялал жуулчлал, хүнс хөдөө аж ахуй хөнгөн үйлдвэрлэл, уул уурхай, хөрөнгө оруулалтын орчин зэрэг улсаа бүхий л салбараар сурталчлан оролцож байна.
Мөн тус ЭКСПО-д АПУ ХК, Очир дагинас ХХК, Майндтэч ХХК, Монфүүдланд ХХК, Сайн түмэн кашмер ХХК, Говь газар ХХК, Түмэнсүлжээ ХХК, Тэсо корпораци Грийн групп зэрэг компаниуд бүтээгдэхүүнээ сурталчлан оролцож байна. Оролцогч компаниудын хувьд энэхүү ЭКСПО-д оролцсоноор дэлхийн 150 гаруй орны төлөөлөл болсон тэргүүлэгч аж ахуйн нэгжүүд, салбарын удирдлага, хөрөнгө оруулагчидтай нэгэн дээвэр дор цуглан хамтын ажиллагаагаа өргөжүүлэх, туршлага солилцох, бизнесийн шинэ түншлэлтэй болох, дэлхийн хамгийн том зах зээлтэй улсад бараа бүтээгдэхүүнээ экспортлох маш том боломж бүрдэж байна.
