МҮХАҮТ, БШУ-ны яамны харьяа Шинжлэх Ухааны Паркийн захиргаатай хамтын ажиллагааны санамж бичиг байгууллаа
Технологид суурилсан өрсөлдөхүйц аж ахуйн нэгжүүдийг бий болгох, оюуны өмчийн арилжаа бүхий технологийн зах зээлийг хөгжүүлэх ажлын хүрээнд хамтран ажиллах санамж бичигт МҮХАҮТ-ын Ерөнхийлөгч Д.Энхтүвшин, БШУЯ-ны харьяа Шинжлэх ухааны паркийн захиргааны гүйцэтгэх захирал Б.Амарсанаа нар гарын үсэг зурлаа.
Санамж бичгийн хүрээнд: Технологид суурилсан өрсөлдөхүйц гарааны компани, жижиг дунд үйлдвэрийг бий болгон хөгжүүлэх, бойжуулах шинэ технологи, инновацыг эдийн засгийн эргэлтэд оруулах чиглэлээр хамтарсан төсөл хөтөлбөр, арга хэмжээнүүдийг санаачлан хэрэгжүүлж, Холбогдох эрдэм шинжилгээний байгууллагууд, бизнесийн салбарын хамтарсан судалгаа шинжилгээний төсөл хэрэгжүүлэх, судалгааны ажил хамтран хийж гүйцэтгэх юм.
Мөн инновацын үйл ажиллагаанд оролцогч хувь хүн, аж ахуй нэгжийн хүний нөөцийн чадавхыг сайжруулах зорилгоор дунд, богино хугацааны сургалт зохион байгуулах, Оюуны өмчийн арилжаа бүхий технологийн зах зээлийг хөгжүүлэх чиглэлээр хууль, эрх зүйн орчныг сайжруулах талаар хамтран санал боловсруулах, бизнес эрхлэгчдийн оролцоог хангах зэргээр хамтран ажиллахаар тогтлоо.