“Булган мах маркет” компани Япон Улс руу адууны мах экспортлоно

Япон Улсын Токио хотноо 2024 оны 3 дугаар сарын 5-наас 8-ны өдрүүдэд зохион байгуулагдаж буй “FOODEX JAPAN 2024” олон улсын цогц үзэсгэлэнд “Булган мах маркет” компани нь Японы мах, махан бүтээгдэхүүний томоохон импортлогч худалдааны компанитай хамтран оролцож, улмаар монгол адууны мах болон дайвар бүтээгдэхүүнийг Японы зах зээлд нийлүүлэх тухай гэрээнд японы талтай гарын үсэг зурлаа.

Монголын эрүүл бэлчээрт өсгөж үржүүлсэн адууны мах нь цэвэр органик гэдгээр амт чанар нь үнэлэгдэж ийнхүү японы зах зээлд нийлүүлэгдэхээр боллоо.

Энэхүү гэрээ, хэлцлийг амжилттай болгоход МҮХАТ болон Япон дахь салбар танхим дэмжлэг үзүүлэн хамтарч ажилласан юм.

Дашрамд дурдахад “Foodex Japan 2024”арга хэмжээнд дэлхийн 70 орчим улс орны 2000, Японы 1000 орчим компани оролцож хүнсний бүтээгдэхүүн болон үйлдвэрлэлийн тоног төхөөрөмжөө танилцуулж байна.