FOODEX 2024 үзэсгэлэнгийн эргэн тойронд
Япон улсад жил бүр уламжлал болон зохион байгуулагддаг хүнсний үзэсгэлэн "Foodex Japan 2024"-ыг үзэх, Японы үйлдвэрүүдээр орж танилцан туршлага судлах, бизнесийн түншүүдтэй уулзах зорилго бүхий бизнес групп аяллыг МҮХАҮТ-аас зохион байгуулж, "Дүүрэн фүүд" ХХК, "Макс фүүд" ХХК, "Булган мах маркет" ХХК, "Газар шим" ХХК, "Дорнод мах Маркет", "Силк рөүд трейдинг ХХК, "Стандарт фүүд" ХХК, "Тесо фүүдс" ХХК, "Дэй чаннел" ХХК, "Монэнзим Мед" ХХК-ийн төлөөлөл оролцож байна.
Групп эхний өдрөө Япондоо амжилттайд тооцогддог бизнесийн сайн загвар гэгддэг Ибараки мужийн Намэгата хотын “Намэгата фаамүз бриж” компанийн түүхий эд тариалалт, хадгалалт, боловсруулалт, бүтээгдэхүүн үйлдвэрлэл, технологи болон борлуулалтын менежментийг аялал жуулчлалын салбартай хэрхэн уялдуулан хөгжүүлж байгаатай танилцлаа. Япон улсад хямд зардлаар, Монголынхоо түүхий эдийг ашиглан үйлдвэрлэл эрхэлж улмаар Made in Japan тэмдгээр бүтээгдэхүүнийг Дэлхийн зах зээлд нийлүүлэх талаар үзэж, танилцлаа.
Хоёрдахь өдөр Япон улсын хүнсний салбарын шилдэг үйлдвэрүүдтэй танилцах аялал хийлээ. Эхлээд Ёкохама мужид байрлах Nisshin Oillio үйлдвэртэй танилцаа. Энэ үйлдвэр нь 3000 гаруй ажилтантай, хүнсний тос, амтлагч Дэлхийн олон оронд нийлүүлдэг томоохон групп компани юм. Дараагийн үйлдвэр Сайтама мужид байрлах Шёвагийн 6 онд (1931) байгуулагдсан өдгөө 93 жилийн түүхтэй, соус, бүх төрлийн шөл, карри, ууттай бэлэн хоолны төрлөөр үйлдвэрлэл явуулдаг Хэйва үйлдвэр байлаа.
Дашрамд дурдахад “Foodex Japan 2024” арга хэмжээнд Дэлхийн 70 орчим улс орны 2000, Японы 1000 орчим компани оролцож хүнсний бүтээгдэхүүн болон үйлдвэрлэлийн тоног төхөөрөмжийг танилцуулж байна. Манай групп үзэсгэлэнгээ үзэж сонирхон хүнсний салбарын бизнес эрхлэгчидтэй цаашдын хамтын ажиллагаагаа эхлүүлэн амжилттай туршлага солилцож байна.