“Хөдөлмөрийн зах зээлийн дунд хугацааны эрэлт, нийлүүлэлтийн таамаглал” судалгааны үр дүнг бизнес эрхлэгч нарт танилцууллаа

МҮХАҮТ-аас ХНХЯ-тай хамтран ‘’Хөдөлмөрийн зах зээлийн дунд хугацааны эрэлт, нийлүүлэлтийн таамаглал’’ судалгааны үр дүн танилцуулах уулзалт, хэлэлцүүлгийг зохион байгууллаа.

Хэлэлцүүлэгт МҮХАҮТ-ын Ерөнхийлөгч Д.Энхтүвшин, Хөдөлмөр нийгмийн хамгааллын Дэд сайд С.Зулпхар болон 120 гаруй аж ахуйн нэгж болон хувь хүмүүсийн төлөөлөл оролцсон юм.

“Хөдөлмөрийн зах зээлийн дунд хугацааны эрэлт нийлүүлэлтийн таамаглал” судалгааг ХНХЯ-ны захиалгаар “MMCG’’ ХХК хийсэн байна. Судалгаагаар эдийн засгийн салбараар ажил мэргэжлүүдийн 2035 он хүртэлх трендийг гаргаж, жил бүрийн салбар ажил мэргэжлийн матрицийг тооцоолсон бөгөөд тус матриц нь эдийн засгийн 19 салбар, 10 гол ажил мэргэжлийн ерөнхий ангиллаар хийгдсэн байна.

Тус судалгааны зөвлөх багийн зүгээс цаашид авч хэрэгжүүлэх арга хэмжээний бодлогын зөвлөмжийн төслийг 5 бүлэг, 30 гаруй арга хэмжээний хүрээнд боловсруулжээ.

Мөн ХНХЯ-наас “Хөдөлмөр эрхлэлтийг дэмжих тухай” хуулийн шинэчилсэн найруулгын төслийг бизнес эрхлэгчдэд танилцуулж, санал авлаа. Тус хуулийг анх 2001 онд баталж, 2006, 2008, 2012, 2015, 2016, 2021 онуудад нийт 16 удаагийн нэмэлт, өөрчлөлт оруулсан. Хуулийн төслийн зорилго нь Эдийн засгийн өсөлт, зохистой хөдөлмөр эрхлэлтийг дэмжих, хөдөлмөрийн зах зээлийн тэнцвэрт байдлыг хангах, оролцогч талуудын эрх, үүргийг тодорхойлох замаар хөдөлмөр эрхлэлтийн түвшинг нэмэгдүүлж, иргэний ажилгүйдлээс хамгаалуулах эрхийг хангах юм.