ХБНГУ-д ажлын айлчлал хийж байна
2019 оны 11 сарын 06 өдөр: ХБНГУ-д ажлын айлчлал хийж буй МҮХАҮТ-ын төлөөлөгчид өнөөдөр Лайпциг хотын ХАҮТ-ын бүтэц, үйл ажиллагаа, гишүүнчлэлийн бодлого, экспортыг дэмжих болон худалдааг хөнгөвчлөх чиглэлээр явуулж буй үйл ажиллагаатай танилцан туршлага солилцож, хамтарч ажиллах талаар ярилцлаа.
Мөн тус хотын Гар урчуудын Танхимын дэргэдэх Мэргэжлийн сургалт, технологийн төвөөр зочилсон юм. Улсын хэмжээнд Гар үйлдвэрлэгчдийн 52 Танхим байдаг бөгөөд эдгээр хосолсон мэргэжлийн төвөөр дамжуулан үйл ажиллагаагаа явуулдаг аж.
2019 оны 11 сарын 05 өдөр, 21:00 цаг: ХБНГУ-д ажлын айлчлал хийж буй МҮХАҮТ-ын Ерөнхийлөгч О.Амартүвшин тэргүүтэй төлөөлөгчид Германы Худалдаа, хөрөнгө оруулалтын газарт зочилж, бүтэц, гишүүнчлэлийн бодлого, экспортыг дэмжих болон худалдааг хөнгөвчлөх чиглэлээр явуулж буй үйл ажиллагаатай нь танилцлаа.
Тус байгууллага нь ХНБГУ-д хөрөнгө оруулах сонирхолтой ААН, хувь хүмүүсийг мэдээллээр хангах, зуучлах зэргээр нээлттэй ажилладаг бөгөөд Засгийн газраасаа санхүүждэг аж.
2019 оны 11 сарын 05 өдөр, 09:00 цаг: ЕХ-ны санхүүжилтээр хэрэгжиж буй Худалдааг дэмжих TRAM төслийн хүрээнд MҮХАҮТ, ГХЯ, Улаанбаатар хотын гаалийн газар болон "Одь тана", "Ханбогд кашмер", "Сор кашмер" зэрэг компанийн төлөөлөл оролцсон баг ХБНГУ-д ажлын айлчлал хийж байна.
Айлчлалын хүрээнд төлөөлөгчид Германы Худалдаа Аж Үйлдвэрийн Танхимуудын Холбоо (ГХАҮТХ)-нд зочилж цаашид хоёр орны Танхимуудын хамтын ажиллагааг өргөжүүлэх, хамтарч ажиллах шинэ боломжуудын талаар санал солилцов.
Энэ үеэр ГХАҮТХ-ы Удирдлагын багийн төлөөлөгч Иля Нотнагел, Зүүн болон Зүүн өмнөд Европ, Төв Азийг хариуцсан ажилтан Макси Хуйлсе нар үйл ажиллагаагаа танилцуулж, Германы олон улсын хамтын ажиллагааны нийгэмлэгийн мэргэжилтэн Аннетте Вилл өөрийн орны төр, хувийн хэвшлийн хэлцлийн тогтолцооны талаар илтгэл тавьж мэдээлэл өглөө.
