Зөвшөөрлийн тухай хуулийн хэрэгжилт, түүний үр нөлөө хэлэлцүүлэг амжилттай зохион байгуулагдлаа
МҮХАҮТ-аас Засгийн газрын хэрэг эрхлэх газар, Эдийн засаг, хөгжлийн яам, Хууль зүй, дотоод хэргийн яамтай хамтран “Зөвшөөрлийн тухай хуулийн хэрэгжилт, түүний үр нөлөө” хэлэлцүүлгийг 2024 оны 02 дугаар сарын 27-ны өдөр зохион байгууллаа. Хэлэлцүүлэгт яамд болон төрийн бусад байгууллагын 20 гаруй төлөөлөл, хувийн хэвшлийн 100 гаруй төлөөлөл болон иргэд оролцож хуулийн хэрэгжилт, үр нөлөө, тулгамдаж буй асуудлаа ярилцлаа.
Тус хэлэлцүүлэгт Эдийн засаг, хөгжлийн дэд сайд Г.Түвдэндорж “Зөвшөөрлийн тухай хуулийн хэрэгжилтийг хангах талаар авч хэрэгжүүлж буй арга хэмжээний талаар” илтгэл тавьж 93 тусгай зөвшөөрөл бүрэн цахимжсан талаар онцолсон юм.
МҮХАҮТ-ын дэргэдэх хууль зүйн бодлогын зөвлөлийн дарга, Зөвшөөрлийн зөвлөлийн гишүүн Ө.Жамбалсүрэн “Зөвшөөрлийн тухай хуулийн хэрэгжилтийн явцад бизнест тулгамдаж буй асуудлын талаар” илтгэлдээ хууль хэрэгжиж эхэлснээс хойш 7 удаа нэмэлт өөрчлөлт орсон нь хуулийн тогтворгүй байдал үүсгэж улмаар бизнест эрхлэгчдэд учрах сөрөг үр дагаврын талаар онцоллоо.
Панелистаар Засгийн газрын хяналт хэрэгжүүлэх газрын дарга, Зөвшөөрлийн зөвлөлийн дэд дарга Б.Баасандорж, Эдийн засаг, хөгжлийн яамны Инновацын бодлогын газрын дарга Т.Золзаяа, Монголын уул уурхайн үндэсний ассоциаци ТББ-ын гүйцэтгэх захирал Г.Эрдэнэтуяа, Сэнтрал Экспресс Си Ви Эс ХК-ийн хуулийн алба хариуцсан дарга Б.Нямбаяр нар оролцож, асуултад хариуллаа.
Хэлэлцүүлгийн үеэр хуулийн хэрэгжилт, хууль хоорондын давхцалын талаар хэд хэдэн асуудлууд хөндөгдсөн бөгөөд Зөвшөөрлийн зөвлөлийн дэд дарга Б.Баасандорж зарим асуудлыг холбогдох газарт нь уламжилж, хууль хоорондын давхцалыг Зөвшөөрлийн зөвлөлөөр хэлэлцүүлэх санал оруулахаа мэдэгдсэн юм.
МҮХАҮТ-аас энэ удаагийн хэлэлцүүлгээс гарсан саналууд болон өмнө нь бизнес эрхлэгчдээс танхимд ирүүлсэн саналуудыг нэгтгэн Зөвшөөрлийн зөвлөл болон холбогдох эрх бүхий байгууллагуудад хүргүүлэн ажиллах болно.
