Төрийн өмчийн бодлого, зохицуулалтын газар болон МҮХАҮТ - ын дэргэдэх Бизнесийн ёс зүйн төв хамтын ажиллагааны санамж бичиг байгууллаа

Төрийн болон орон нутгийн өмчит аж ахуйн нэгжүүдийн ашигт ажиллагаа, засаглал, төр хувийн хэвшлийн хамтын ажиллагааг шинэ шатанд гаргах, хариуцлагатай бизнес, комплаенс хэвшүүлэх чиглэлээр дэмжих, чадавхжуулах, бүтээмжийг дээшлүүлэхэд хамтран ажиллах зорилгоор Төрийн өмчийн бодлого, зохицуулалтын газар болон МҮХАҮТ-ын дэргэдэх Бизнесийн ёс зүйн төв хооронд хамтын ажиллагааны санамж бичиг байгууллаа.

Монгол Улсад 102 төрийн өмчит болон төрийн өмчийн оролцоотой компани, төрийн өмчийн үйлдвэрийн газар байгаа бөгөөд үүнээс “Эрдэнэс Монгол” ХХК-ийн харьяанд 13, Сангийн яамны харьяанд 6, Төрийн өмчийн бодлого, зохицуулалтын газрын харьяанд 83 төрийн өмчит компани, төрийн өмчит үйлдвэрийн газар ажиллаж байна.

ТӨБЗГ нь Төрийн болон орон нутгийн өмчийн талаарх хууль, эрх зүйн орчинг боловсронгуй болгох, төрийн өмчит хуулийн этгээдэд компанийн засаглалыг хөгжүүлэх, төрийн өмчийн эзэмшилт, ашиглалтад хяналт тавих замаар төрийн өмчийн үр өгөөжийг нэмэгдүүлэхэд чиглэсэн арга хэмжээ авч ажилладаг.

МҮХАҮТ-ын дэргэдэх Бизнесийн ёс зүйн төв нь МҮХАҮТ, Рио Тинто Монгол ХХК, Транспэрэнси Интернэншл ТББ - ын хамтын ажиллагаагаар хэрэгжиж буй “Бизнесийн ёс зүй, шударга байдлыг бэхжүүлэх” төслийн хүрээнд МҮХАҮТ - ын дэргэд 2021 онд байгуулагдсан.

Тус төв нь хариуцлагатай шударга, нээлттэй, ил тод байдлыг бэхжүүлэх зорилгоор сургалт, зөвлөх үйлчилгээ, цахим ном сан, олон улсын хөтөлбөрүүд болон олон нийтэд чиглэсэн арга хэмжээг зохион байгуулдаг бөгөөд  өнгөрсөн хугацаанд нийт 500 гаруй компанийн, 1000 гаруй мэргэжилтэн болон гүйцэтгэх удирдлагуудад хүрч ажилласан. Цаашид үйл ажиллагааныхаа цар хүрээг өргөжүүлэн төр, хувийн хэвшлийн бизнесийн байгууллагууд, олон улсын байгууллагуудтай хамтран ажиллахаар төлөвлөж байна.