МҮХАҮТ болон Хөрөнгө оруулалт худалдааны газар хамтран ажиллана
МҮХАҮТ-ын дарга Т.Дүүрэн болон ЭЗХЯ-ны харьяа Хөрөнгө оруулалт, худалдааны газрын дарга В.Энхбаатар нар байгууллага хоорондын үр дүнтэй хамтын ажиллагааг өргөжүүлэх, хөрөнгө оруулалт, худалдаа, нэн ялангуяа уул уурхайн бус экспортыг дэмжих, хөгжүүлэх, тэдгээрийн нэг цэгийн үйлчилгээний нэгдмэл засаглал, мэдээллийн системийг бий болгох, хөрөнгө оруулалт татах чиглэлээр хамтран ажиллах зорилго бүхий Хамтын ажиллагааны санамж бичигт 2024 оны 02 дугаар сарын 20-ны өдөр гарын үсэг зурлаа.
Талууд хөрөнгө оруулагчид болон бизнес эрхлэгчдийг хөрөнгө оруулалт, худалдааны чиглэлийн бүх төрлийн мэдээллээр хангах нэг цэгийн нэгдсэн үйлчилгээг нэвтрүүлэх, хөрөнгө оруулагчдын эрх ашгийг хамгаалах, гомдлыг шийдвэрлэх тогтолцоо, үйл явцыг тодорхой болгох, сайжруулах, хөрөнгө оруулалт шаардлагатай томоохон төсөл, хөтөлбөрийн талаар харилцан мэдээлэл солилцох, хөрөнгө оруулалт, худалдааны эрх зүйн орчинг боловсронгуй болгоход шаардагдах судалгаа явуулах, санал, зөвлөмж боловсруулан хөрөнгө оруулалтын бодлого, стратегийн баримт бичгийн төсөлд санал өгөх, уулзалт, хэлэлцүүлэг, хурал, зөвлөгөөн зохион байгуулах, олон улсын үзэсгэлэн /экспо/-г зохион байгуулахад хамтран ажиллахаар тохирлоо.