Үндэсний үйлдвэрчид нэгдэн франчайзинг хийх боломжтой
Дотоодын ЖДҮ бизнес эрхлэгчдэд франчайзингийн процессын талаар мэдлэгээ нэмэгдүүлэх, цаашдын чиг хандлагын талаар мэдээлэл өгөх, шийдвэр гаргахад нь тус дөхөм болох зорилгоор "Франчайзинг хийхэд бэлэн байна уу?" сургалтыг зохион байгууллаа.
Сургалтыг Европын Холбооны Азийн хөрөнгө оруулалтын сангаас санхүүжүүлдэг "Монголын ЖДБ-ийн санхүүжилтын хүртээмжийг нэмэгдүүлэх замаар эдийн засгийн төрөлжүүлэлтийг дэмжих" хөтөлбөрийн хүрээнд ЕСБХБанк, МҮХАҮТ хамтран явууллаа.
Сургалтыг олон улсын франчайзингийн менежментээр дэлхийд алдартай брэндүүд болох House of Fraser, Taco Bell, Ikea, Top Shop болон ЖДБ-ийн салбарт 34 жил ажилласан туршлагатай хатагтай Фарра Роүз удирдан явуулсан бөгөөд франчайзинийн менежмент, санхүүжилт болон брэндийн дүрх төрх бүрдүүлэлт зэрэг сонирхолтой сэдвүүдээр илтгэл танилцуулж оролцогчдын асуултад дэлгэрэнгүй хариулт өгөв.
Сүүлийн жилүүдэд Монгол Улсын зах зээлд Burger King, Pizza Hut, KFC, CU зэрэг олон улсын франчайзингийн брэндүүд хүч түрэн орж ирж байгаа учир МҮХАҮТ-ын зүгээс дотоодын бизнес эрхлэгчдийг франчайзингийн сүлжээ бий болгон хүчээ нэгтгэн ажиллахад дэмжих бодлого барьж, Франчайзингийн зөвлөл байгуулан ажиллаж байгаа юм.
