Ногоон эдийн засаг-Ногоон бизнес” арга хэмжээг зохион байгууллаа

2023/12/05 0

МҮХАҮТ, Европын Холбоо, ЕСБХБ хамтран “Ногоон эдийн засаг-ногоон бизнес” арга хэмжээг зохион байгууллаа. Тус арга хэмжээнд МҮХАҮТ-ын ерөнхийлөгч Д.Энхтүвшин оролцож үг хэллээ.

Тэрээр, Бизнест ашиг орлогыг голчилдог уламжлалт байдал үндсээрээ өөрчлөгдөн тогтвортой хөгжил, байгаль орчин ба нийгэмд үзүүлэх нөлөөлөл, хүний эрхийн асуудал бизнесийн салшгүй нэг хэсэг болж байна. Хэрэглэгч, хөрөнгө оруулагчид болон банк санхүүгийн байгууллагууд бизнесийн өртгийн сүлжээ, ханган нийлүүлэлтийн бүхий л тогтолцоо, үйл явцыг хүрээлэн буй орчин, байгальд ээлтэй ногоон бизнестэй холбон анхаарч үзэх болсноор энэ нь бизнесийн оршин тогтнохтой холбоотой чухал хүчин зүйлүүдийн нэг болоод байна.

Монгол Улс эрчим хүчний үр ашгийг тогтвортой хөгжилд хүрэх гол арга хэмжээний нэг гэж тодорхойлсон.

Парисын хэлэлцээрийн хүрээнд хүлэмжийн хийн ялгарлыг бууруулах үндэсний хэмжээнд тодорхойлсон хувь нэмрийн зорилт, Үндэсний ногоон хөгжлийн бодлого, Төрөөс эрчим хүчний талаар баримтлах бодлого, Эрчим хүчний дунд хугацааны стратеги зэрэг бодлогын гол баримт бичгүүдэд 2030 он гэхэд эрчим хүчний үр ашгийг дээшлүүлэх шаардлагатай нүүр тулж байна. Даян дэлхийн институтаас Монгол улсад хийсэн судалгаагаар нүүрсээр ажилладаг станцуудын нийт хүлэмжийн хийн ялгаралт 2035 он гэхэд ойролцоогоор 56 сая тонн хүрнэ гэсэн тооцооллыг хийсэн.

Монгол Улс сэргээгдэх эрчим хүч рүү илүү хүчтэй шилжиж, эдийн засагтаа эрчим хүчний үр ашгийг дээшлүүлэх олон арга хэмжээг авч хэрэгжүүлсэнээр хүлэмжийн хийн ялгаруулалт 2035 он гэхэд 2 дахин буурах боломжтой гэсэн судалгааны үр дүн гарсан. Сэргээгдэх эрчим хүчийг тогтвортой нэмэгдүүлэх, төсөл хөтөлбөрүүдийг төр хувийн хэвшлийн түншлэлийн зарчмаар хэрэгжүүлэх хэрэгцээ шаардлагатай тулгарч байна гэдгийг хэллээ.

Арга хэмжээ ЖДБ-үүд ногоон эдийн засгийн концепцуудыг хэрхэн тусгах вэ хэлэлцүүлгээр үргэлжилж байна. МҮХАҮТ-ын ерөнхий нарийн бичгийн дарга С.Баясгалан оролцож ногоон эдийн засаг, бизнесийн талаарх байр сууриа илэрхийлэв.

Мөн тус арга хэмжээнд ногоон технологи , ногоон бизнесийн чиглэлээр бараа бүтээгдэхүүн үйлдвэрлэгч аж ахуйн нэгжүүдийн төлөөлөл үзэсгэлэн гарган оролцлоо.