“Захиргааны хэм хэмжээний актын хуульд нийцсэн байдал, хоорондын уялдаа, давхардал, зөрчлийг арилгах асуудал” сэдэвт хэлэлцүүлэг боллоо
Хууль зүй, дотоод хэргийн яамнаас санаачлан МҮХАҮТ-тай хамтран “Захиргааны хэм хэмжээний актын хуульд нийцсэн байдал, хоорондын уялдаа, давхардал, зөрчлийг арилгах асуудал” хэлэлцүүлгийг /2023.11.23/ зохион байгууллаа.
Хэлэлцүүлгийг МҮХАҮТ-ын дэд захирал Ц. Магнайбаатар нээж, МҮХАҮТ-аас бизнесийн холбогдолтой хууль тогтоомж, бодлогын баримт бичиг боловсруулах үйл ажиллагаанд бизнес эрхлэгчдийн оролцооны түвшин тодорхойлох асуулгыг 2022 оны 12 сард цахимаар авсан. Тус асуулгад Улаанбаатар хот болон орон нутгийн нийт 1603 аж ахуйн нэгж, бизнес эрхлэгчид хамрагдсан. Холбогдох бодлого, хууль, дүрэм журам шийдвэр гаргах процесст бизнес эрхлэгчдийн оролцооны түвшин ямар байгаа тухайд 16 хувь нь сайн, 46 хувь нь дунд, 34 хувь нь муу гэж үзсэн.
Томоохон аж ахуйн нэгжүүд оролцооны түвшинд илүү сайн, дунд үнэлгээ өгсөн бол жижиг дунд аж ахуйн нэгжүүд оролцооны түвшинд илүү муу үнэлгээг өгсөн үр дүн гарсан байдаг. Иймд холбогдох эрх зүйн актын төсөл болон бичиг баримтад саналаа илүү сайн өгч, илүү идэвхтэй, оролцоотой байх нь чухал байна. Энэ дашрамд дурдахад бизнесийн орчинд тулгардаг нийтлэг асуудлын гарц шийдлийг олох, бизнес эрхлэх таатай орчныг бүрдүүлэхэд хувь нэмэр оруулах зорилгоор МҮХАҮТ-ын дэргэд Хууль зүйн бодлогын зөвлөл 2018 оноос үйл ажиллагаагаа эхлэн 2022 оны 9 дүгээр сард шинэчлэн байгуулагдан ажиллаж байна.
Зөвлөлийн бүрэлдэхүүнд аж ахуйн нэгжүүдийн хуулийн албаны захирлууд, ахлах хуульчид, МУИС-ын Хууль зүйн сургуулийн профессор, Монголын Олон Улсын Арбитрын арбитрчид багтдаг бөгөөд энэхүү зөвлөлд МҮХАҮТ-ын гишүүн компаниудын хуулийн асуудал хариуцсан төлөөллүүд орох нь нээлттэй гэдгийг тэрээр хэллээ.
Мөн хэлэлцүүлэгт Хууль зүй, дотоод хэргийн Дэд сайд Б.Солонгоо оролцож, Захиргааны хэм хэмжээний актын хуульд нийцсэн байдал, хоорондын уялдаа, давхардал, зөрчлийг арилгах асуудлыг судлан танилцуулах чиг үүрэг бүхий ажлын хэсэг Монгол Улсын Ерөнхий сайдын захирамжаар байгуулагдан ажиллаж байгаа талаар танилцуулав. Хууль зүй, дотоод хэргийн яамнаас захиргааны хэм хэмжээний актын улсын нэгдсэн санд бүртгэлтэй нийт 2744 шийдвэрт хяналт-шинжилгээ, үнэлгээний ажлыг холбогдох захиргааны байгууллагуудтай хамтран хийж Засгийн газрын хуралдаанд танилцуулахаар ажиллаж байгаа талаар дурдаад энэхүү ажилд МҮХАҮТ болон бизнес эрхлэгчидтэй хамтран ажиллана гэв.
Хэлэлцүүлэгт ХЗДХЯ-ны төлөөлөл, Шүүхийн шийдвэр гүйцэтгэх ерөнхий газар болон Авлигатай тэмцэх газар, МҮХАҮТ-ын дэргэдэх Хуулийн бодлогын зөвлөл, Монголын барилгын үндэсний ассоциаци, Мэдээлэл холбооны операторуудын ассоциаци ТББ, Монголын банк бус санхүүгийн байгууллагуудын холбоо зэрэг 40 гаруй бизнес эрхлэгчдийн төлөөлөл, хуулийн асуудал хариуцсан захирлууд оролцлоо.
