Бүгд Найрамдах Серби Улсаас Монгол Улсад хавсран суух Элчин Сайд эрхэмсэг хатагтай Маяа Стефановичийг хүлээн авч уулзлаа
Элчин сайд Маяа Стефанович Серби Улс нь Хятад, Өмнөд Солонгос, АНУ гэх мэт улсуудтай хөнгөлөлттэй худалдааны гэрээ зурсан байгаагаа дурдаад жимс жимсгэнэ, овьёос, эрдэнэ шиш, үр тариа экспортлох, Монголын уул уурхайн салбарын туршлагыг судлах сонирхолтой байгааг дурдаад, Серби улсын барилгын салбар болон мах боловсруулалт нь өндөр түвшинд явагддаг ба туршлага солилцох нь нээлттэй гэдгийг хэлэв.
Мөн Серби Улсын хойд хэсэгт байрлах био технологи, био эм үйлдвэрлэлийн институт нь ХАА-н салбарт их чухал үүрэг гүйцэтгэдэг бөгөөд Монгол улсад энэ туршлыг нэвтрүүлэх, хөгжүүлэх замаар боловсон хүчин солилцох боломжтой ба Европ руу холбох гүүр болж ажиллана гэдгээ онцлов.
МҮХАҮТ-ын Дэд захирал Ц.Магнайбаатар, цаашид мэдээ мэдээллээ тогтмол солилцож, туршлага хуваалцаж, ард иргэдийн найрсаг харилцаан дээр тулгуурлан хоёр орны эдийн засгийн харилцааг хөгжүүлэхэд анхаарч ажиллахаа илэрхийллээ.
Талууд хоёр улсын үзэсгэлэн, яармаг нь бизнес эрхлэгчдэд бараа бүтээгдэхүүнээ хоёр улсын зах зээлд таниулан сурталчлахад чухал гэдгийг онцлоод /Серби – 2027 Экспо - Белград хот, Монгол улс - International spring trade fair 2024, Ulaanbaatar partnership 2024/ тогтмол зохион байгуулагддаг үзэсгэлэнгийн талаар мэдээлэл солилцлоо.
Уулзалтад Элчин сайд Маяа Стефанович, Атташе Милан Кузманович, Өргөмжит консул Б.Зоригт нар байлцав.
