“Стандарт ба Хөгжил” чанарын чуулган боллоо

Стандарт Хэмжил Зүйн Газар, Монголын Үндэсний Худалдаа Аж Үйлдвэрийн Танхим хамтран “Үндэсний чанарын чуулган” нэгдсэн арга хэмжээг 9 дэх жилдээ “Стандарт ба хөгжил” сэдвийн хүрээнд зохион байгуулав.

Чуулганыг УИХ-ын гишүүн, МУ-ын Засгийн газрын гишүүн, МУ-ын шадар сайд С.Амарсайхан, МҮХАҮТ-ын Гүйцэтгэх захирал Т. Дүүрэн нар нээж үг хэлэхдээ, “Чанар бол амжилттай бизнес, удирдлагын тогтолцооны болон бүтээгдэхүүний стандартыг нэвтрүүлэн үйл ажиллагаагаа тогтвортой хадгалах, цаашид улам бүр сайжруулах замаар олон улсын түвшинд хүрэх, засаглалын зөв тогтолцоо юм. Үндэсний хэмжээнд чанарын дэд бүтцийг олон улсын нийтлэг, жишигт нийцүүлэх, чадамжийг дээшлүүлэх, бизнесийн үйл ажиллагаанд үзүүлж буй үр нөлөөг улам сайжруулахад анхааран хамтран ажиллана” гэдгийг онцолж байлаа.

Чанарын чуулганы эхний хэсэгт:

• Стандарт хэмжил зүйн газрын даргын албан үүргийг түр орлон гүйцэтгэгч Б.Ууганбаяр, Тогтвортой хөгжлийг чанарын дэд бүтцээр дэмжих нь
• МҮХАҮТ-ын дэргэдэх Ёс зүйн төвийн зөвлөх, хууль зүйн ухааны доктор, PhD Б.Батзориг, Бизнесийн ёс зүй комплаенсын төлөв байдал
• Смарт дийл ХХК-ийн Гүйцэтгэх захирал Д.Болор, Цахим шилжилт ба шийдэл
• Обзерв консалтинг ХХК-ийн Гүйцэтгэх захирал Д.Отгонбат, Менежментийн тогтолцооны стандарт нэвтрүүлэлтийг амжилттай удирдах нь
• Япон Монголын ХКОМ-ын нарийн бичгийн дарга Л.Отгонцэцэг, Хоёр талын хамтын ажиллагааны механизм, төсөл хөтөлбөр хэрэгжүүлсэн туршлага
• Хүнсний эрдэм шинжилгээ үйлдвэрлэлийн Само институт ХХК-ийн гүйцэтгэх захирал, доктор, PhD Г.Оюун, Чанар ба Лаборатори зэрэг сэдвээр илтгэлүүд тавьж, саналаа солилцов.

Компаниудын сайн туршлага хэсэгт:

• Тэсо фүүдс ХХК-ийн огоон дэлхийн тогтвортой хөгжлийн төлөө эрчим хүчний хэмнэлт, үр ашиг ISO50001:2018 Эрчим хүчний менежментийн тогтолцоо
• Монголын алт/МАК/ ХХК-ийн хүлэмжийн хийн тооцоолол, ISO14064-1:2018 стандарт
• АПУ ХК-ийн ISO 9001 Чанарын менежментийн тогтолцоо, ISO 14001 Байгаль орчны менежментийн тогтолцоо, FSSC 22000 Хүнсний аюулгүй байдлын тогтолцооны баталгаажуулалтын стандартуудыг хамтад нь нэвтрүүлсэн талаарх арга туршлагаа хуваалцан илтгэл тавьж, санал солилцлоо.

Оролцогчид “Стандарт ба хөгжил” сэдвээр хэлэлцүүлэг өрнүүлэн гаргасан санал зөвлөмжийг Засгийн газарт хүргүүлэх юм.