МОНГОЛ – ЛАОСЫН БИЗНЕС ФОРУМ БОЛЛОО

Монгол Улсын Ерөнхийлөгч Ухнаагийн Хүрэлсүхийн Бүгд Найрамдах Ардчилсан Лаос Ард Улсад хийж байгаа төрийн айлчлалын хүрээнд  "Монгол – Лаосын бизнес форум"-ыг өнөөдөр /2023.11.06/ тус улсын нийслэл Вьентьян хотноо амжилттай зохион байгуулав.

Форумд МҮХАҮТ-ын Ерөнхийлөгч Д.Энхтүвшин Монгол Улсын бизнесийн орчин сэдвээр, БНАЛАУ-ын Худалдаа, аж үйлдвэрийн яамны Бодлого төлөвлөлтийн газрын дарга Сэнгфаномчоне Интасэнэ Лаос Улсын эдийн засгийн өнөөгийн байдал, хоёр улсын худалдаа, эдийн засгийн хамтын ажиллагаа боломжууд сэдвээр, Монгол Улсын ХХААХҮЯ-ны газрын дарга Э.Анар "Хүнс хөдөө аж ахуйн салбарын хөрөнгө оруулалтын боломжууд сэдвээр, Хүнсний хувьсгал ТББ-ын Удирдах зөвлөлийн гишүүн Г.Энхбилэг нар тус тус илтгэл тавилаа.

Мөн бизнес форумын үеэр МҮХАҮТ, ЛУХАҮТ-ын хооронд хамтран ажиллах тухай харилцан ойлголцлын санамж бичгийг хоёр талын танхимуудын Ерөнхийлөгчид үзэглэв.

Форумын үеэр хоёр улсын бизнес эрхлэгчдийн дунд В2В,  Монгол Улсын экспортын бараа бүтээгдэхүүний танилцуулах үзэсгэлэн худалдааг зохион байгууллаа.