“ХЯТАДЫН ОЛОН УЛСЫН ИМПОРТЫН ЭКСПО VI” ЭХЭЛЛЭЭ
БНХАУ-ын Худалдааны яам, Шанхай хотын Ардын Засгийн газар хамтран 6 дахь удаагаа зохион байгуулж буй "Хятадын Олон Улсын Импортын экспо" /2023.11.06/ өнөөдөр нээлтээ хийлээ.
Тус үзэсгэлэнд хүнс, хөдөө аж ахуй, ухаалаг тоног төхөөрөмж, шинэ дэвшилтэт техник технологи, автомашин, өргөн хэрэглээний бараа бүтээгдэхүүн болон эрүүл мэнд, аялал жуулчлал, соёл, боловсрол, тээвэр логистик зэрэг салбарын 128 улсын 3400 гаруй аж ахуйн нэгж өөрсдийн үйлдвэрлэсэн бараа бүтээгдэхүүнээрээ оролцох аж.
Монгол Улсын Засгийн газрын хэрэгжүүлэгч агентлаг Жижиг дунд үйлдвэрийн газар, Монголын Үндэсний Худалдаа Аж Үйлдвэрийн Танхим ерөнхий зохион байгуулагчаар ажиллаж, Олон улсын дүр төрхийн хэсэгт Монгол Улс 136м2 талбайд ноос ноолуур болон хүнсний бүтээгдэхүүнийг танилцуулан сурталчилж байна.
Нээлтийн арга хэмжээнд Монгол Улсаас БНХАУ-д суугаа Элчин сайд Т.Бадрал, ЖДҮГ-ын Зээл төслийн хэлтсийн дарга Н.Энхтөр, МҮХАҮТ-ын Үзэсгэлэнгийн газрын дарга Ч.Баттулга нар оролцлоо.
Улс орнуудын олон улсын худалдааг өргөжүүлэх, хамтын ажиллагааны боломжийг хуваалцах, Хятадын зах зээлд экспортоо нэмэгдүүлэх боломжийг олгодог Хятадын Олон Улсын Импортын экспо" VI нь 2023 оны 11 дүгээр сарын 5-наас 10-ны өдрүүдэд үргэлжилнэ.
Тус экспо нь 6 дах удаагаа болж байгаа бөгөөд Монгол улсын хувьд 2 дахь удаагаа оролцож, уул уурхайн бус экспортын бараа болох ноос ноолуур, хүнс, шингэн хүнсний бүтээгдэхүүн үйлдвэрлэгч аж ахуйн нэгжүүдийг сурталчилан таниулах зорилготой.
