Монгол-Беларусийн бизнес уулзалтыг зохион байгууллаа
Монголын Үндэсний Худалдаа Аж Үйлдвэрийн Танхим, Бүгд Найрамдах Беларусь Улсаас Монгол Улсад суугаа Элчин Сайдын Яам, Беларусийн Үндэсний үзэсгэлэнгийн төв (2023.10.02) хамтран хоёр улсын бизнес төлөөллийн ганцаарчилсан уулзалтыг зохион байгуулав.
Уулзалтын нээлтэд МҮХАҮТ-ын Дарга Т.Дүүрэн "Хоёр улсын худалдаа эдийн засгийн харилцаа улам өсөн нэмэгдэж, олон салбарт хамтын ажиллагаа эрчимжиж буйг тэмдэглэн, Засгийн газар хоорондын экспортын зээлийн төсөл батлагдсанаар 29 сая евро үнийн дүн бүхий Монгол Улсад сүүний кластер байгуулах төсөл хэрэгжүүлэх шатандаа явж байгаа бол 21 сая евро үнийн дүн бүхий Монголд нэн шаардлагатай газар тариалангийн машин механизм, комбайн, трактор, тусгай зориулалтын техник авто машин, тоног төхөөрөмж нийлүүлэх төсөл амжилттай хэрэгжсэн хэмээн дурдав. Мөн 2023 оны 9 дүгээр сарын байдлаар хоёр улсын худалдааны эргэлт нийт 22,709.05 мян.ам. долларт хүрсэн бол манай улсын экспорт 452,48 мян.ам.доллар, импорт 22,257.02 мян.ам.долларт хүрсэн байна. Иймд цаашид МҮХАҮТ-ын зүгээс Бүгд Найрамдах Беларусь Улсын хамтран ажилладаг талуудтай худалдаа, эдийн засгийн хамтын ажиллагааг улам өргөжүүлэх, харилцан худалдааг нэмэгдүүлэх, тээвэр логистикийн асуудлуудыг шийдвэрлэхэд нягт хамтран ажиллана” гэв.
Арга хэмжээнд Беларусь Улсаас Монгол Улсад суугаа Элчин Сайдын Яамны төлөөллүүд, Беларуссийн талаас сүү сүүн бүтээгдэхүүн, хөдөө аж ахуй тариалангийн тоног төхөөрөмж, МАЗ авто машин, тусгай зориулалттай гэрэлтүүлэг, хамгаалалтын зориулалтын оптик-электрон бүтээгдэхүүн болон хивс үйлдвэрлэл зэрэг салбарын 6 аж ахуйн нэгж оролцсон бол Монголын талаас салбарын 14 аж ахуйн нэгж оролцов.
