МҮХАҮТ-ын дэргэдэх Эрчим Хүчний Зөвлөл болон БНХАУ-ын Бугат хотын олон улсын худалдааг дэмжих хороон хамтарсан уулзалт боллоо
МҮХАҮТ-ын ЕНБД С.Баясгалан "Эрчим хүчний салбарын туршлага, хөгжил, хамтын уялдаа холбоо, хүний нөөц, хөрөнгө оруулалт гээд олон хүчин зүйлс дээр Танхим болон Танхимын дэргэдэх Эрчим хүчний зөвлөл БНХАУ-ын Бугат хоттой хамтран ажиллана" гэв.
Бугат хотын Олон улсын худалдааг дэмжих зөвлөлийн дарга Ли Вэньшя “Бугат хот хамгийн том салхин сэнс болон газрын ховор элементийг ашиглан шинэ бараа бүтээгдэхүүнийг үйлдвэрлэж байна. Мөн онгоц, машин, уул уурхайн тоног төхөөрөмжүүдийг үйлдвэрлэн дотоодын болон олон улсын зах зээлд нийлүүлэн ажиллаж байна. Бугат хот 2.8 сая хүн амтай бөгөөд ДНБ-ний хэмжээ Монгол улсаас 4 дахин их байна. Танхим болон Танхимын дэргэдэх эрчим хүчний зөвлөлөөр дамжуулан эрчим хүчний салбарын хамтын ажиллагааг нэг шат ахиулан ажиллах маш өргөн цар хүрээтэй боломжууд бий болж байна” хэмээн нээлтийн үгэндээ онцоллоо.
МҮХАҮТ-ын дэргэдэх Эрчим хүчний зөвлөлийн дарга Д.Ганхуяг “Хоёр орны эрчим хүчний салбарын хамтын ажиллагааг өргөжүүлэх, харилцан туршлага солилцох, олон ажил хэрэгч уулзалтуудыг зохион байгуулах, салбарын чадварлаг хүний нөөцийг бэлтгэхэд хамтран ажиллахад эрчим хүчний зөвлөл анхаарч ажиллана” хэмээв.
Тус уулзалтад Бугат хотын эрчим хүчний технологи, үйлдвэрлэлийн “Шуанлянь”, “Хойд нутгийн газрын ховор элементийн групп, “Бугат ган төмрийн групп болон МҮХАҮТ-ын дэргэдэх эрчим хүчний зөвлөлийн 20 гаруй гишүүн байгууллагууд оролцлоо.
