“HALAL TRACK, TRACE and RECALL” хяналт баталгаажуулалтын системийг хамтран хэрэгжүүлнэ

Монголын Халал Хөгжлийн Холбооноос санаачлан МҮХАҮТ, төрийн болон олон улсын байгууллага, хувийн хэвшлийн байгууллагуудын дэмжлэгээр “HALAL MONGOLIA 2023 – Бизнес форум” анх удаагаа 8 дугаар сарын 28-ны Даваа гарагт МҮХАҮТ-ын Их Танхимд зохион байгуулагдлаа.

Арга хэмжээг МҮХАҮТ-ын орлогч дарга Б.Намжилсүрэн нээж хэлсэн үгэндээ цаг үеэ олсон чухал ач холбогдолтой арга хэмжээ болохыг онцлоод, “Халал гэх энэ ойлголт бидний хувьд нэн шинэ ойлголт, энэ ойлголт нь хүнсний үйлдвэрлэлээс эхлэн байгальд тулгуурласан боловсруулах бүхий л үйлдвэрлэлд нэвтрүүлж байгаа шинжлэх ухааны хэмжээнд цогц, системтэйгээр боловсруулж буй тогтолцоо болсон” хэмээн тодотгов.

Мөн Монголд боловсруулсан Халал шошготой мах, бусад хүнсний бүтээгдэхүүнүүдийг халал журмыг баримталсан эсэхийг хөөн хянах тогтолцоо алга байна. Ихэнх нь өөрсдөө, системийн бусаар бүртгэж байгаа боловч импортлогч талын хувьд ийм мэдээллийг итгэмжлэхэд хүндрэл үүсдэг болохыг цохон дурдсан юм.

Цаашид Монголын экспорлогч болон импортлогч нарыг Халалын ёс зүйн дүрэм журмыг баримтлан бизнес хийхэд нь шаардлагатай мэдлэг, мэдээллээр хангах, олон улсаас хууль ёсоор итгэмжлэгдсэн Халал баталгаажуулалтын Монгол дахь байгууллагаас хянан баталгаажуулсны үндсэн дээр экспортлогчдод Халал гэрчилгээ олгуулах, ингэхдээ хэрэглэгчид, худалдан авагчдад ээлтэй халал цахимжуулалтын хяналтын бүрэн системийг нэвтрүүлэх чиглэлд талууд төвлөрч ажиллахаар болов.

Монголын Халал Хөгжлийн холбоо болон Монголын Худалдаа аж үйлдвэрийн танхимын хамтран хэрэгжүүлэх технологийн төсөл болох “HALAL TRACK, TRACE and RECALL” хяналт баталгаажуулалтын систем нь дэлхийн дээр халал журамд тавигдах бүх шаардлагыг хангасан дэвшилтэт систем. Манай улсын хувьд анхлан ашиглах гэж буй цоо шинэ систем гэдгээрээ онцлог. Энэхүү систем нь Монголын үйлдвэрлэгчид, экспортлогчдыг өсөн нэмэгдэж буй Халал бизнес ертөнцтэй холбох шинэ гарцыг нээх, олон улсын үнэ цэнийн сүлжээнд Монголд үйлдвэрлэв гэсэн шошготой бүтээгдэхүүн борлуулагдах боломжийг бүрдүүлэх юм.

Халал зах зээл рүү мах болон хүнсний бүтээгдэхүүн экспортолдог, экспортлохоор бэлдэж буй Монголын аж ахуйн нэгж, энэ чиглэлээр ажилладаг төрийн байгууллагуудын төлөөлөл анхдугаар бизнес форумд оролцсон бөгөөд Халал амьдралын хэв маяг, стандартчлал болон итгэмжлэл олгох шаардлага, АСЕАН-ы орнуудын ХАЛАЛ зах зээлийн боломж, инновац болон мэдээллийн технологи ашиглах нь зэрэг сэдвээр Малайз, Тайланд, Индонез, Бруней, Сингапур зэрэг орнуудаас ирсэн төлөөлөгчид илтгэл тавьж, хэлэлцүүлэг өрнүүллээ.

Форумын үеэр АСЕАН-ы орнуудын халал бизнес эрхлэгчид өөрсдийн бүтээгдэхүүний дээжээр үзэсгэлэн зохион байгуулав.