Сургагч багш бэлтгэх “Хариуцлагатай бизнес, шударга байдлын аргачлал хэвшүүлэх” сургалтыг зохион байгууллаа
Монголын Үндэсний Худалдаа Аж Үйлдвэрийн Танхимын дэргэдэх Бизнесийн ёс зүйн төвөөс сургагч багш бэлтгэх “Хариуцлагатай бизнес, шударга байдлын аргачлал хэвшүүлэх” сэдэвт сургалтыг 8 дугаар сарын 25, 26 - ны өдрүүдэд зохион байгууллаа.
Тус сургалт нь бизнесийн үйл ажиллагаа явуулахад тулгардаг авлига, ашиг сонирхлын зөрчлийг тодорхойлох, тухайн нөхцөл үүсэх үед баримтлах бизнесийн ёс зүйн стандартыг хэвшүүлэх, олон улсын сайн жишгийг нэвтрүүлэх, агуулгын хувьд практикт суурилсан мэдлэг, чадвар олгох, сургагч багшийн ур чадварыг эзэмшүүлэхэд чиглэв.
M Си Эс Холдинг ХХК, Мобиком корпораци, Говь ХК, Эрдэнэс Монгол ХХК, ХААН Банк, Макс Импекс ХХК, Сэнтрал Экспресс ХК, Энержи Ресурс ХХК, Марч Констракшн ХХК, Санхүүгийн зангилаа ТББ тэргүүтэй TOП-100 аж ахуйн нэгжүүдийн төлөөллүүд, жижиг дунд бизнес эрхлэгч компаниуд, бичил бизнес эрхлэгчид зэрэг хувийн хэвшлийнхэн болон их, дээд сургуулийн багш нар, Монголын Үндэсний Худалдаа Аж Үйлдвэрийн танхим, танхимын орон нутгийн салбарын ажилтнууд оролцлоо.
Сургалтад ёс зүй, комплаенс хариуцсан голлох мэргэжилтэнүүд нь хамрагдсан нь онцлог байлаа. Оролцогчид бизнесийн ёс зүй, комплаенсын талаар мэдлэг ойлголтоо нэмэгдүүлж, өөрийн байгууллагадаа дээрх сэдвийн хүрээнд сургалт явуулах боломжтой боллоо. Оролцогч байгууллагуудын хувьд уул уурхай, барилга, бөөний болон жижиглэн худалдаа, сүлжээ дэлгүүр, харилцаа холбоо, боловсрол, ноос ноолууран бүтээгдэхүүн зэрэг нийгэм болон бизнесийн олон салбарт үйл ажиллагаа явуулж байна.
Монгол Улс дахь бизнесийн ёс зүй, шударга байдлыг бэхжүүлэх, бизнесийн таатай орчныг дэмжих зорилгоор хэрэгжүүлж буй “Бизнесийн ёс зүй, шударга байдлыг бэхжүүлэх" төслийг “Рио Тинто Монгол” ХХК, Монголын Үндэсний Худалдаа Аж Үйлдвэрийн Танхим (МҮХАҮТ), Транспэрэнси Интернэшнл Монгол ТББ, МҮХАҮТ-ын дэргэдэх Бизнесийн Ёс Зүйн Төв хамтран хэрэгжүүлж байна. Бизнесийн ёс зүйн төв нь 2021 онд МҮХАҮТ-ын дэргэд байгуулагдсан.
Бизнесийн ёс зүйн төв нь сургалт, зөвлөх үйлчилгээ, цахим номын сан, судалгаа зэрэг үйл ажиллагааг тогтмол явуулж ирсэн бөгөөд ажлын уулзалтууд, дугуй ширээний уулзалт ярилцлага болон Бизнесийн Ёс Зүй, Комплаенсын Үндэсний II Форум, Ёс зүйтэй бизнес-Тогтвортой өсөлт хэлэлцүүлэг зэргийг зохион байгуулаад байна.