Худалдаа, эдийн засгийн хамтын ажиллагааны төслүүдээ танилцуулав
МҮХАҮТ, БНХАУ-ын ӨМӨЗО-ны Худалдааны танхим, БНХАУ-аас Монгол Улсад Хөрөнгө оруулагчдын ЗУНХУА нийгэмлэг хамтран “Монгол Улс-БНХАУ-ын ӨМӨЗО-ны Худалдаа, эдийн засгийн хамтын ажиллагааны төслийн танилцуулга” уулзалтыг зохион байгууллаа. Уулзалтад БНХАУ-аас Монгол Улсад суугаа ЭСЯ-ны худалдааны зөвлөх Сүн Сие Жүн, МҮХАҮТ-ын Ерөнхийлөгч О.Амартүвшин, ӨМӨЗО-ы Худалдааны танхимын дарга Жан Хун Фү, Эрчим хүчний яамны бодлого, төлөвлөлтийн газрын сэргээгдэх эрчим хүчний хэлтсийн дарга Ш.Ганзориг, Эрчим хүчний эдийн засгийн хүрээлэнгийн гүйцэтгэх захирал М.Түмэнжаргал, Эрчим хүчний үндэсний төв ТӨХК-ийн Сэргээгдэх эрчим хүчний хэлтсийн дарга Д.Пүрэвсүрэн болон Монгол, Хятадын ААН-ийн төлөөлөл оролцов.
МҮХАҮТ-ын Ерөнхийлөгч О.Амартүвшин уулзалтын эхэнд хэлсэн үгэндээ Монгол Улсын Засгийн газраас гадаадын хөрөнгө оруулалт, төр хувийн хэвшлийн түншлэлийг нэмэгдүүлэх хууль эрх зүйн орчныг сайжруулах ажлыг шат дараатай хэрэгжүүлж, хөрөнгө оруулалтын тогтвортой, таатай нөхцөлийг бүрдүүлсэн хөдөө аж ахуйн парк, хилийн боомтуудыг түшиглэсэн чөлөөт бүсүүдийг бий болгож буй өнөө үед хоёр орны бизнес эрхлэгчдийг холбох, харилцан ашигтай худалдаа, бизнесийн харилцааг нэмэгдүүлэх, худалдаанд тулгарч буй саад бэрхшээлүүдийг арилгахад хувийн хэвшлийн төлөөллийн байгууллагууд, ХАҮТ-уудын хамтын ажиллагаа чухал гэдгийг онцлов.
МҮХАҮТ-ын Ерөнхий нарийн бичгийн дарга С.Баясгалан “Уул уурхайн салбарын хөгжилд тээвэр, логистикийн гүйцэтгэх үүрэг”, Эрчим хүчний яамны БТГ-ын Сэргээгдэх эрчим хүчний хэлтсийн дарга Ш.Ганзориг “Монгол Улсын сэргээгдэх эрчим хүчний өнөөгийн байдал”, Эдийн засаг, хөгжлийн яамны Хөрөнгө оруулалтын бодлогын газрын мэргэжилтэн Б.Төгөлдөр “Монгол Улсын эдийн засгийн нөхцөл, хөрөнгө оруулалтын орчин”-ы талаар тус тус танилцуулж, Тээвэр логистикийн хамтарсан төслүүд болон сэргээгдэх эрчим хүчний төслүүдэд БНХАУ-ын хөрөнгө оруулж, хамтарч ажиллахыг урилаа.
Уулзалтын төгсгөлд сэргээгдэх болон цахилгаан эрчим хүч, тээвэр логистикийн чиглэлийн компаниудын уулзалт, хэлэлцүүлгүүд болов.
