"Эдийн засгийн коридор"-ын бүтээн байгуулалтад ХАҮТ-ууд хэрхэн хамтарч ажиллах талаар хэлэлцэнэ
Монгол-Хятад-Оросын ХАҮТ-уудын Худалдаа эдийн засгийн XVI нэгдсэн чуулган "Эдийн засгийн коридорын бүтээн байгуулалтад ХАҮТ-уудын хамтын ажиллагаа ба түншлэл" сэдвийн хүрээнд 2023 оны 6 дугаар сарын 8-10-ны өдрүүдэд Улаанбаатар хотноо зохион байгуулагдана.
Гурван улсын Худалдаа, Эдийн засгийн чуулганд ОХУ-ын ХАҮТ-ын ерөнхийлөгч Катырин С.Н., БНХАУ-ын ОУХДХ-ны орлогч дарга Жан Шао Ган тэргүүтэй 250 гаруй төлөөлөгч, бизнес эрхлэгч оролцоно.
Монгол-Хятад-Оросын ХАҮТ-уудын нэгдсэн чуулганы хүрээнд Эдийн засгийн коридороос гадна хөдөө аж ахуйн экспорт, уул уурхай, аялал жуулчлал, тээвэр логистик, чөлөөт бүс болон хөрөнгө оруулалтын талаар хэлэлцэнэ.
Мөн харилцан мэдээлэл солилцох, мэдээллийн зөрүүтэй байдлыг арилгах, харилцан туршлага хуваалцах, бизнесийн шинэ боломжийг олж харах, шинэ харилцааны эхлэлийг тавих, түншлэлийг шинэ түвшинд гаргах арга хэмжээ болох юм.
Монгол Улсын гадаад худалдааны эргэлт 2022 оны гүйцэтгэлээр 21.2 тэрбум ам.доллар байгаагаас гадаад худалдааны 64 хувийг БНХАУ-тай, 12.7 хувийг ОХУ-тай хийж байна. Манай Улс гадаад худалдааны 76.7 хувийг хоёр хөрштэйгөө хийж буй бөгөөд гурван улсын эдийн засгийн чуулган нь Эдийн засгийн коридорын асуудлыг хөндөн хэлэлцэх төдийгүй худалдааны эргэлтийг нэмэгдүүлэх, татвар, хөрөнгө оруулалтын таатай орчныг бүрдүүлэх, хамтын ажиллагааг эрчимжүүлэх зэрэг ач холбогдолтой юм.
