Нийт 40 сая ам.долларын гэрээ, 7 санамж бичигт гарын үсэг зурлаа

Монгол Улсын Ерөнхий сайдын БНКазУ-д хийж буй айлчлалын хүрээн дэх Монгол, Казаxстаны "Бизнес форум"-ыг энэ сарын 11-нд МҮХАҮТ болон БНКазУ-ын үндэсний компани "Казах-инвест"-тэй хамтран зохион байгууллаа.

Бизнес форумыг нээж хоёр орны Ерөнхий сайд үг хэлсэн юм. Хоёр орны эдийн засаг, бизнесийн харилцааг шинэ түвшинд гаргахын тулд уул уурхай, хүнсний үйлдвэрлэл, мал аж ахуй, газар тариалан, газрын тос, сэргээгдэх эрчим хүч, аялал жуулчлал зэрэг олон салбарт байгаа нөөц боломжийг хамтран ашиглах нь зүйтэй гэж үзэж буйгаа илэрхийллээ.

Монгол, Казахстаны 300 орчим бизнес эрхлэгч, албаны төлөөлөгч оролцсон уг форумд нэг гэрээ, зургаан санамж бичигт гарын үсэг зурагдлаа. Үүнд:

1. Алт, мөнгө /үнэт металл/ цэвэршүүлэх үйлдвэр барих, ашиглалтад оруулах тухай” гэрээ “Сымбат инжинеринг” хязгаарлагдмал хариуцлагатай нөхөрлөл, “Эрдэнэс Алт ресурс” ХХК нар,
2. Танхим хоорондын хамтын ажиллагааны үндсэн зарчмуудыг тодорхойлж хоёр талын худалдаа эдийн засгийн хамтын ажиллагааг өргөжүүлэн хөгжүүлэхэд дэмжлэг үзүүлэх, бизнес эрхлэгчдийн эрх ашгийг хамгаалах, хамтын ажиллагаа хөгжүүлэхэд туслалцаа үзүүлэх санамж бичиг- Казахстаны Гадаад худалдааны танхим, МҮХАҮТ-ын Ерөнхийлөгч О.Амартүвшин нар,
3. Монгол дахь нүүрсний ордоос ферросилицион «Ферросиликоалюминия» үйлдвэрлэх үйлдвэр байгуулах санамж бичиг- “Казахстан Улсын эрдсийн түүхий эд иж бүрэн боловсруулах үндэсний төв” улсын үйлдвэрийн газар Жарменов А.А., “Коеус консалтинг” ХХК захирал Б.Цогбадрах нар,
4. Дизель болон бензин хөдөлгүүрт машинд зориулсан түлш хэмнэх катализатор нийлүүлэх төслийг хэрэгжүүлэх санамж бичиг- Казахстан Улсын “KazECOFiILTER” компаний захирал Лепихин Я.А. , “Коеус консалтинг” ХХК гүйцэтгэх захирал Э.Ган-Эрдэнэ нар,
5. Агаарын ачаа тээшийн техникийн үйлчилгээ, нислэгийн экипаж-баг, инженер техникийн үйлчилгээний мэргэжилтнгүүдийг сургах тухай санамж бичиг-Ерөнхийлөгч Денисов В.И. “Mongolian Air way cargo” ХХК Ч. Хоролсүрэн нар,
6. ”Экспортын үйл ажиллагаанд шаардлагатай шинжилгээний тест, хорио цээрийн болон биологийн бэлдмэлийн талаар хамтын ажиллагаа хөгжүүлэх тухай” санамж бичиг- “Шинжлэх ухаан үйлдвэрлэлийн “Антиген” хязгаарлагдмал хариуцлагатай нөхөрлөл Ахмед Садыков, “Global business link” ХХК Ерөнхий захирал З.Батсүх нар,
7. “Хорио цээрийн бэлдмэл үйлдвэрлэх, хорио цээрийн ажилтнуудын сургалтын төв байгуулахад хамтран хөрөнгө оруулах тухай” санамж бичиг- “Шинжлэх ухаан үйлдвэрлэлийн “Антиген” хязгаарлагдмал хариуцлагатай нөхөрлөл Ахмед Садыков “Ashigt feed” ХХК Зөвлөх З.Батсүх нар болно.

БНКазУ-ын Гадаад худалдааны танхимын Удирдлагын даргын үүрэг гүйцэтгэгч Букейханов Нуралы Алимович "Хоёр орны хувьд мах экспортлох тал дээр байгаа том боломжоо түлхүү ашигламаар байна" хэмээлээ. Мөн тэрбээр Монгол, Казахстан улс хоорондын нийт худалдааны эргэлт 35,7 сая ам.долларт хүрч байгааг онцолсон юм.