Монгол-Казахстаны бизнес форум болж байна
Монгол Улсын Ерөнхий сайдын айлчлалын хүрээнд Бүгд Найрамдах Казаxстан Улсад Монгол Казахстаны бизнес форум 10 дугаар сарын 10-12-нд болж байна. Уг бизнес форумд МҮХАҮТ, шилдэг аж ахуйн нэгжийг төлөөлж 32 компанийн 40 бизнес эрхлэгч оролцож байгаа бөгөөд төлөөлөгчид Астанагийн Олон улсын санхүүгийн төвтэй танилцлаа.
Астана Олон Улсын Санхүүгийн Төв (AIFC) нь Казахстаны нийслэл Астана хотноо 2018 оны 7 дугаар сарын 5-ны өдөр албан ёсоор нээгдсэн. 2015 онд ерөнхийлөгч Н.Назарбаевын санаачилсан "100 тодорхой алхам" үндэсний хөтөлбөрийг хэрэгжүүлэх, Казахстан Улсыг 2050 онд дэлхийн өндөр хөгжилтэй 30 орны нэг болгох хэтийн зорилтыг хангахаар энэхүү санхүүгийн нэгдсэн платформыг байгуулжээ.
Тус төв нь “ЭКСПО-2017” олон улсын үзэсгэлэнг зохион байгуулсан цогцолборт байрлах бөгөөд Евразийн Эдийн засгийн холбоо, Төв Ази, Ойрхи Дорнодын орнууд, БНХАУ-ын баруун мужууд, Монгол Улс болон Европын орнуудын эдийн засгийн сонирхлыг татах, олон улсын санхүүгийн үйл ажиллагаанд голлох үүрэгтэй оролцох зорилгоор байгуулагдсан. Тус төвийн удирдах зөвлөлд Казаxстаны анхны ерөнхийлөгч Н.Назарбаев дэлхийн санхүүгийн томоохон корпорацийн удирдлагууд ордог байна. Уг төвийн харьяанд "Астана" санхүүгийн үйлчилгээ үзүүлэх газар, "AIFC Court" буюу англо-саксон эрх зүйн системд тулгуурласан шүүх, "AIFC International Arbitration Centre" буюу арбитрын шүүх, "AIFC Bureau" санхүүгийн салбарын мэргэжилтэн, боловсон хүчнийг давтан сургах төв тус тус багтдаг.
