Эдийн засагт залуучуудын оролцоо-2019" залуу бизнес эрхлэгчдийн чуулган МҮХАҮТ-ын Их танхимд эхэллээ
Эдийн засагт залуучуудын оролцоо-2019" залуу бизнес эрхлэгчдийн чуулган МҮХАҮТ-ын Их танхимд эхэллээ. Чуулганыг нээж УИХ-ын гишүүн Л.Элдэв-Очир, МҮХАҮТ-ын дэд дарга Б.Намжилсүрэн, ГБХЗГ-ын Залуучуудын хөгжлийн газрын дарга Б.Сэлэнгэ нар үг хэллээ. Мөн МҮХАҮТ-ын Ерөнхийлөгч О.Амартүвшин биечлэн оролцож чадаагүй ч видео мэндчилгээ дэвшүүлж, чуулганд оролцогчдод амжилт хүсэв.
Тэрбээр "Бизнес эрхлэх амаргүй, гэхдээ бизнесийн орон зай Монголд хязгааргүй. Бид энэ орон зай, мэдээллийн урсгалыг зөв удирдаж, залуусаа чиглүүлэх болно. Залуучуудтай ажиллах нь бидэнд олон зүйлийг товчлох боломж олгож байна" гэлээ.
Эдийн засагт залуучуудын оролцоо-2019" чуулганд нийслэл, 21 аймгийн 300 гаруй бизнес эрхлэгч залуус оролцож байна.
"Марс Ви" төслийн удирдагч, МҮХАҮТ-ын Инноваци хариуцсан зөвлөх С.Эрдэнэболд: Миний одоо ярих юм та нарт хэт агаарын санагдаж магадгүй. Гэхдээ 88 жилийн өмнө, нэгэн найрагч монгол залуу 25-тайдаа "Од" хэмээх шүлгээрээ шинжлэх ухааны 7 том асуултыг хөндөж тавьсан байдаг. Өнөөдөр бол технологийн, инновацийн, оюун санааны зуун. Залуус бид төр засгаас дэмжлэг авчихаад, мөнгө босгочихоод том төсөл хэрэгжүүлнэ гэж болохгүй. Түрүүлж ярьж, ойлгуулж, хүн үнэмшихгүй, үнэлэхгүй байлаа ч өөрсдөө итгэл үнэмшил дүүрэн байх ёстой. "Марс Ви" төсөл бол хүн төрөлхтний Марс гарагийг эзэмших хүсэл тэмүүллийн холбоос байх болно. Манай баг сансар судлалын шинжлэх ухааны салбарт ажиллаж буй эрдэмтэн судлаачид, инженер техникийн чадварлаг залуусыг эгнээндээ нэгтгэсэн. Бид Марсын сургуулилалтын академи, сансарын судалгааны чөлөөт бүс, аялал жуулчлалын дагуул хотоос бүрдсэн шинжлэх ухаан технологи, инновацийн олон улсын төв байгуулна.
"Сургалт, судалгааны Полиси төв"-ийн Захирал Г. Эрдэнэгэрэл: Сүүлийн 30 жилийн бизнес бол үнэндээ "коопий паст" байлаа. Гадаад эзэнтэй компанийг Монголд салбарлуулах, гадаад хүний хийсэн юмыг Монголд зарах, гадаад удирдлагатай нэг сүлжээний эрэг шураг болох хэмжээнд л монгол хүмүүс ажиллаж ирсэн. Одоо бид өөрсдөө нэгдээд, өөрсдийнхөө бизнесийг хийцгээе. "Амжилтын цамхаг руу хүн бүр тэмүүлдэг. Гэхдээ ганцаараа хүрсэн хүн байхгүй" гэж үг бий. Одоо зүгээр л чаддаг чаддагаараа нэгдээд дор бүрнээ амбицлах биш дундын ашиг сонирхлоо тодорхойлж, хариуцлагатай хамтарч бизнесээ томруулъя.
"Сор кашимер" ХХК-ийн гүйцэтгэх захирал н.Бархасбадь: Амьдрал хэцүү, бэрхшээл их байна, төр засаг муу байна гэхээсээ илүү бидэнд өөрсдөд маань ямар асуудал байна гэдгээ харах болсон. Өөрсдөө үгээ хэлж, зөв дуугарч, зөв тэмцэж байгаа нэгнээ харлуулах биш дэмжих, ялгах салгах хэрэгтэй байна. Залуус бидний урмыг юу хугалдаг вэ ямар нэг төсөл, тендэрт оролцлоо гэхэд аль хэдийн гүйцэтгэгч нь тодорчихсон байдаг байдал. Тиймээс бизнес дэх улс төрийн оролцоог хязгаарласан хуулийн бүх заалтыг дэмжиж, үгээ хэлдэг, сонирхдог, оролцдог байх ёстой.
UA consulting ХХК-ийн захирал А.Урангоо: Үл хөдлөх хөрөнгө зуучлалын компаниа 6 жилийн өмнө байгуулж байхад хүмүүсийн сэтгэлгээ одоогийнхоос тэс өөр байсан. Юм бүтээдэггүй, бусдын хөрөнгийг зүгээр зуучлаад зардаг, ченжүүд гэж хардаг байсан. Хэдий тийм байсан ч бид зориглоод ямар нэг юмны стандарт үүсгэх хэрэгтэй юм байна лээ. Одоо хөрөнгө зуучлал, үл хөдлөхтэй холбогдсон үнэ цэнэ, үйлчилгээний стандарт ямартаа ч тогтсон. Ямар ч асуудал гарч ирсэн тууштай байвал стандартыг нэхэх биш өөрсдөө үүсгэж чадна.
Эдийн засаг дахь залуучуудын оролцоог хэлэлцэж байна
МҮХАҮТ-ын дэргэдэх Бизнес эрхлэгч залуучуудын зөвлөлөөс зохиож буй "Эдийн засагт залуучуудын оролцоо-2019" чуулга уулзалт "Нэг зорилго нэг бодлого" уриатайгаар үргэлжилж байна.
Үдээс хойшхи хуралдаан "Монгол экспорт" дэд сэдвээр болж байгаа бөгөөд Эрдэнэс Тавантолгой ХК-ийн гүйцэтгэх захирал Б.Ганхуяг, Монголын худалдааг дэмжих TRAM төслийн ахлах зөвлөх Карл Круг, Монгол дахь ОХУ-ын Худалдааны төлөөлөгч М.В.Василиев нар илтгэл тавьж, БНХАУ-ын Баяннуур аймгийн E-export төслийн зохицуулагч Д.Ариунжаргал "Хил дамнасан худалдаа-e-export" төслөө танилцууллаа.
Бизнес эрхлэгч залуус зөвлөмж гаргалаа
"Эдийн засагт залуучуудын оролцоо-2019" чуулган амжилттай зохиогдож, чуулганы оролцогчдоос МҮХАҮТ-ын дэргэдэх Бизнес эрхлэгч залуучуудын зөвлөлд хандаж зөвлөмж гаргалаа.
Зөвлөмжид гарааны бизнес эхлүүлж буй залууст эхний 5 жилийн татварын хөнгөлөлт үзүүлэх, бизнест шударга өрсөлдөөн бий болгох чиглэлээр хууль эрхзүйн орчин бүрдүүлэх, хамтын оффисыг 21 аймаг, нийслэлийн 9 дүүрэгт байгуулах, дотоодын болон олон улсын зах зээлд амжилттай нэвтрэхэд гааль, татварын болон бусад дэмжлэгийг эрхзүйн хүрээнд зохицуулж өгөх зэргийг тусгасан байна. МҮХАҮТ-ын дэргэдэх Бизнес эрхлэгч залуучуудын зөвлөл эдгээр санал санаачилгыг ажил хэрэг болгохоор бүх шатанд асуудлыг тавьж, хамтарч ажиллахаа мэдэгдлээ.
