ЖИЖИГ, ДУНД БИЗНЕС ЭРХЛЭГЧДЭД ХУУЛЬ ЭРХ ЗҮЙ, ТӨРИЙН ДЭМЖЛЭГИЙН ТАЛААР МЭДЭЭЛЭЛ ХҮРГЭЛЭЭ
Монголын Үндэсний Худалдаа Аж Үйлдвэрийн Танхим болон холбогдох төрийн байгууллагууд хамтран жижиг, дунд бизнес эрхлэгчдэд зориулсан мэдээлэл, хэлэлцүүлгийн арга хэмжээг зохион байгууллаа.
Арга хэмжээг МҮХАҮТ-ын гүйцэтгэх захирал Ц.Магнайбаатар, Жижиг, дунд үйлдвэрийн газрын дарга Я.Эрдэнэсайхан,
Нийслэлийн Жижиг, дунд үйлдвэр, үйлчилгээг дэмжих төв НӨҮГ-ын дарга Д.Ундармаа, Хөдөлмөр, халамжийн
үйлчилгээний ерөнхий газрын дарга З.Бауыржан нар нээж, жижиг, дунд бизнес эрхлэгчдийг дэмжих чиглэлээр
хэрэгжүүлж буй бодлого, үйл ажиллагааны талаар танилцууллаа.
Хөтөлбөрийн хүрээнд Юнайтед бизнес ривью ХХК-ийн захирал Д.Асралт “Инноваци ба хамтын уураг тархи” сэдвээр илтгэл тавьж, бизнесийн хөгжилд инноваци, хамтын ажиллагааны ач холбогдлыг хөндсөн бол
Жижиг, дунд үйлдвэрийн газрын Зээл, төслийн газрын ахлах мэргэжилтэн Н.Сарантуяа Жижиг, дунд үйлдвэрийг хөгжүүлэх сангийн үйл ажиллагаа, санхүүжилтийн боломжийг танилцуулав.
Мөн Хөдөлмөр, халамжийн үйлчилгээний ерөнхий газрын Хөдөлмөрийн бодлогын хэрэгжилтийн газрын ахлах мэргэжилтэн Л.Санжсүрэн хөдөлмөр эрхлэлтийг дэмжих үйл ажиллагаа, хөтөлбөрүүдийн талаар мэдээлэл өглөө.
Татварын багц хуульд орсон өөрчлөлтийг “Монголтакс ТМЗ” ХХК-ийн үүсгэн байгуулагч, дэд профессор, доктор Х.Тунгалагмаа, Нийгмийн даатгалын тухай хуульд орсон өөрчлөлтийг Санхүү, эдийн засгийн их сургуулийн ахлах багш
Ч.Өнөржаргал нар тус тус танилцуулсан юм.
Түүнчлэн МҮХАҮТ-ын Гадаад худалдаа, бизнесийн бодлогын газрын дарга Э.Бадамхорол Монгол Улс болон Евразийн эдийн засгийн холбоо, түүний гишүүн орнуудын хооронд байгуулсан Худалдааны түр хэлэлцээрийн хүрээнд нээгдэж
буй экспортын боломжуудыг танилцуулж, МҮХАҮТ-ын Үзэсгэлэн, яармагийн газрын дарга Д.Булганчимэг олон улсын үзэсгэлэнд үр дүнтэй оролцох арга замын талаар мэдээлэл хүргэлээ.
Арга хэмжээний үеэр жижиг, дунд бизнес эрхлэгчид өөрсдийн үйлдвэрлэсэн бараа, бүтээгдэхүүнээр үзэсгэлэн худалдаа гаргаж, бүтээгдэхүүний онцлог, давуу тал, үйлдвэрлэл, үйл ажиллагаагаа оролцогчдод танилцуулсан юм.
Мөн панел хэлэлцүүлгээр төрийн байгууллагын төлөөлөл болон татвар, нийгмийн даатгал, экспорт, үзэсгэлэнгийн чиглэлээр мэргэшсэн илтгэгчид оролцож, бизнес эрхлэгчдийн санал, асуулт, тулгамдаж буй асуудлыг хэлэлцэн, холбогдох мэдээлэл, зөвлөгөө өглөө.
Энэхүү арга хэмжээ нь жижиг, дунд бизнес эрхлэгчдэд хууль эрх зүйн орчны өөрчлөлт, төрийн бодлого, санхүүжилт, хөдөлмөр эрхлэлтийн дэмжлэг болон гадаад зах зээлд гарах боломжийн талаар цогц мэдээлэл хүргэж, бизнесийн үйл ажиллагаагаа өргөжүүлэхэд дэмжлэг үзүүлэхэд чиглэв.
