УИХ-ЫН ДАРГА С.БЯМБАЦОГТ БИЗНЕС ЭРХЛЭГЧИДТЭЙ ӨГЛӨӨНИЙ УУЛЗАЛТ ХИЙЛЭЭ
УИХ-ын дарга С.Бямбацогт бизнес эрхлэгчдийн төлөөлөлтэй өглөөний уулзалт хийж бизнесийн орчныг сайжруулах чиглэлээр зорьж буй ажлуудаа танилцуулан бизнес эрхлэгчдийн санал бодлыг сонслоо.
Уулзалтад УИХ-ын гишүүн Х.Бадамсүрэн, Б.Пунсалмаа, Р.Батболд болон МҮХАҮТ-ын Удирдах зөвлөлийн гишүүд, танхимын дэргэдэх зөвлөлийн дарга нар оролцлоо. УИХ-ын даргын зүгээс бизнес босгох, ажлын байр бий болгох, бизнесийн эрсдэл үүрэх нь амаргүйг сайн мэдэж байгаагаа илэрхийлээд "Төр, бизнес хоёр нэг завинд сууж байгаа, нэгнээ торгож биш, дэмжиж байж хоёулаа хожно, улс хөгжинө. Татвар төлөгчдөө сонсохгүй татварын бодлого гэж байх ёсгүй. Сайн парламент баялаг бүтээгчдээ байнга дэмжинэ" хэмээн онцлов.
МҮХАҮТ-ын Ерөнхийлөгч Б.Лхагважав энэ хавар бизнесийн орчны хууль эрх зүйн томоохон шинэтгэл хийгдэнэ гэсэн хүлээлт бизнес эрхлэгчдийн дунд байгааг дурдаад танхимын судалгаагаар бизнес эрхлэх итгэл тодорхой салбаруудад, тухайлбал худалдаа, үйлчилгээний салбарт буурсан дүнтэй байгаад санаа зовж байгаагаа илэрхийлж, зах зээл дээр авлигагүй, төрийн далд системгүйгээр цэвэр бизнесийн зарчмаар ажиллах орчныг бүрдүүлэх нь чухал байгааг онцоллоо. Мөн борлогдоогүй барааны татварыг урьдчилж төлдөг НӨАТ-ын тогтолцоо нь өртөг болон инфляцыг хөөрөгдөж, бизнесүүдэд дарамт болж, төрийн тайлан, бүртгэлийн шаардлага нүсэр болсон нь зардлыг нэмэгдүүлж байгааг анхаарах шаардлагатайг хэлэв. Мөн Монгол Улс Европ, Евроази болон ОХУ, БНХАУ-ын интеграцын дунд оршдог тул бүс нутгийн энэхүү харилцааг хөдөлгөх гол хүчин нь хувийн хэвшлийн хөгжил байх ёстойг цохон тэмдэглэв.
Уулзалтын үеэр МҮХАҮТ-ын Гүйцэтгэх захирал Ц.Магнайбаатар "Бизнесийн орчны нөхцөл байдал" судалгааны 2026 оны урьдчилсан үр дүнг танилцууллаа. Уг судалгаагаар бизнесийн орчны ерөнхий үнэлгээ дунджаар 2.68 (1-5 онооноос) буюу "дунд" гэсэн үзүүлэлттэй гарсан байна. Ялангуяа засаглал, хууль эрх зүйн орчин хамгийн бага буюу 2.15 үнэлгээтэй гарсан бөгөөд үүнд төрийн байгууллагуудын ажлын уялдаа холбоо муу (1.82), авлига, хээл хахууль их (1.86) байгаа нь голлон нөлөөлжээ. Түүнчлэн төрийн байгууллагуудын нэгж хоорондын уялдаа холбоогүй байдал (34.3%), хүнд суртал (33.9%), дүрэм журмын тодорхойгүй байдал (31.9%) болон авлигал (22.3%) зэргийг нэн тэргүүнд сайжруулах шаардлагатайг судалгааны дүн харуулсныг онцлон танилцууллаа.
Уулзалтад оролцсон бизнес эрхлэгчдийн зүгээс татварын гол зарчмуудад тулгуурлан шийдвэр гаргадаг байх, татварын суурийг нэмэгдүүлэх, татвар жигд шударга байх зарчмыг барих, нийгмийн даатгалын шимтгэлийг бууруулах, гадаад дотоод хөрөнгө оруулагчдыг ялгаварлахгүй байх, НӨАТ-ийн босгыг нэмэгдүүлэх нь аж ахуйн нэгжүүдийг жижигрүүлэх үр дагавар хүргэх эрсдэлтэйг анхаарах, томоохон төслүүдийг татварын бодлогоор дэмжих, цахимжуулалтыг эрчимжүүлэн төрийн зардлыг бууруулах зэрэг олон асуудлаар тодорхой саналуудыг хэллээ.
Уулзалтын төгсгөлд УИХ-ын дарга бизнес эрхлэгчдээс олон тодорхой саналууд хэлсэнд талархан, “саалийн үнээндээ тэжээл өгч байж сүү шимийг нь авдаг”-ийн нэгэн адил төр баялаг бүтээгчдээ дэмжиж байж татварын орлогыг бүрдүүлэн улс орноо авч явах болно гэж дурдсан ба бизнесийн хууль эрх зүйн орчныг сайжруулахад танхим болон бизнес эрхлэгчдийн зүгээс илүү идэвх санаачилгаа гаргах, тодорхой шийдлүүдийг санал болгох шаардлагатайг онцлоод дэмжин ажиллахаа илэрхийллээ.
