"Ур чадвар - Миний ирээдүй" мэргэжил, ур чадвар, хосмог сургалтын өдөрлөг зохион байгуулагдлаа
Залуучуудад ирээдүйн мэргэжлээ танин мэдэх, ур чадвараа сорих, мэргэжлийн ажлын бодит орчинтой танилцах боломж олгох зорилготой “Ур чадвар – Миний ирээдүй” мэргэжил, ур чадвар, хосмог сургалтын өдөрлөгийг зохион байгууллаа.
Өдөрлөгөөр хөдөлмөрийн зах зээлд эрэлттэй мэргэжил, шинэ технологи, ногоон шилжилт болон ажил олгогчдын хүний нөөцийн хэрэгцээ, шаардлагыг танилцуулж, ерөнхий боловсролын сургуулийн 9–12 дугаар ангийн сурагчдад ажил мэргэжлийн чиг баримжаа олгох, мэргэжлээ зөв сонгоход нь дэмжлэг үзүүлэхэд чиглэв. МҮХАҮТ-ын Хосмог сургалтын нэгж өдөрлөгийн хүрээнд “Хосмог сургалтад оролцохын үнэ цэн ба бодит өгөөж” сэдэвт панел хэлэлцүүлэг зохион байгууллаа. Хэлэлцүүлэгт Боловсролын яам, МҮХАҮТ, “Трансвест Монголиа” ХХК, Өмнөговь политехник коллеж, Цахилгаан, автоматжуулалтын холбооны төлөөлөл оролцож, хосмог сургалтын хэрэгжилт, ажил олгогч болон суралцагчдад бий болох үр өгөөж, тулгамдаж буй асуудал, цаашдын хөгжлийн талаар санал, туршлагаа хуваалцав.
Мөн аж ахуйн нэгж, байгууллагын удирдлага, хүний нөөц, сургалт хариуцсан ажилтнуудад хосмог сургалтын тогтолцоо, төр, хувийн хэвшлийн хамтын ажиллагаа, ажлын байран дахь сургагч, дадлагажуулагчийн үүрэг оролцоо болон сургалтын байгууллагатай хамтран ажиллах боломжийн талаар мэдээлэл, зөвлөгөө өглөө.
Хосмог сургалтын чанар, үр өгөөжийг нэмэгдүүлэхэд ажлын байран дахь сургагч, дадлагажуулагчийн ур чадвар чухал ач холбогдолтой. Энэ хүрээнд “Мастер сургагч бэлтгэх” хөтөлбөрт амжилттай хамрагдсан оролцогчдод сертификат гардуулж, цаашид аж ахуйн нэгжийн дотоод сургалтын чадавхыг бэхжүүлэх, ажлын байран дахь сургагчдыг бэлтгэх боломжийг танилцууллаа. Түүнчлэн ажил олгогчдод зориулан хосмог сургалтын хэрэгжилт, татварын зохицуулалт, боломжит хөнгөлөлт, дэмжлэгийн талаар мэдээлэл өгч, Хосмог сургалтын Менежментийн хороог танилцуулан нээлттэй хэлэлцүүлэг өрнүүлэв.
Тус өдөрлөгийг ХБНГУ-ын Эдийн засгийн хамтын ажиллагаа, хөгжлийн яам (BMZ) болон Австрали Улсын Гадаад хэрэг, худалдааны яам (DFAT)-ны хамтарсан санхүүжилтээр Германы Олон Улсын Хамтын Ажиллагааны Нийгэмлэг (GIZ) Монгол Улсын Боловсролын яамтай хамтран хэрэгжүүлж буй “Түншлэлд суурилсан техникийн болон мэргэжлийн боловсрол, сургалт II” (cTVET II) төслийн хүрээнд санаачлан зохион байгуулсан бөгөөд Боловсролын яам, Боловсролын ерөнхий газар, МҮХАҮТ, мэргэжлийн холбоод, аж ахуйн нэгж, боловсролын байгууллагууд хамтран ажиллалаа.
