ХӨДӨӨ АЖ АХУЙН САЛБАРТ ХОСМОГ СУРГАЛТ ХЭРЭГЖҮҮЛЭХ БОЛОМЖ, ХАМТЫН АЖИЛЛАГААГ ХЭЛЭЛЦЛЭЭ
Хөдөө аж ахуйн салбарын хөдөлмөрийн зах зээлийн эрэлт хэрэгцээнд нийцсэн мэргэжилтэй ажилтан бэлтгэх, мэргэжлийн болон техникийн боловсролын хосмог сургалтыг нэвтрүүлэх боломжийг тодорхойлох зорилготой нээлттэй өдөрлөг 2026 оны 11 дүгээр сарын 13-ны өдөр зохион байгуулагдлаа.

Өдөрлөгийг Боловсролын яам, Боловсролын ерөнхий газар, Монголын үндэсний худалдаа, аж үйлдвэрийн танхим (МҮХАҮТ)-ын Хосмог сургалтын менежментийн хороо, Германы Олон улсын хамтын ажиллагааны нийгэмлэг (GIZ)-ийн cTVET2 төсөл хамтран зохион байгуулж, хөдөө аж ахуйн салбарын ажил олгогчид, мэргэжлийн холбоод, сургалтын байгууллагын 50 гаруй төлөөлөл оролцов.

Арга хэмжээг нээж МҮХАҮТ-ын Бизнес академийн дарга Д.Бямбадорж, Боловсролын яамны шинжээч Д.Эрдэнэбат, GIZ-ийн cTVET2 төслийн удирдагч Д.Оюунаа нар үг хэлж, хосмог сургалтыг салбарт нэвтрүүлэхэд төр, хувийн хэвшил болон боловсролын байгууллагуудын хамтын ажиллагаа чухал болохыг онцоллоо.

Өдөрлөгийн хүрээнд Боловсролын яамны шинжээч Д.Эрдэнэбат хосмог сургалт хэрэгжүүлэх зөвлөмж, эрх зүйн зохицуулалт болон Азийн хөгжлийн банкнаас хөдөө аж ахуйн салбарын чиглэлээр хийсэн судалгааны үр дүнг танилцуулав. Мөн GIZ-ийн cTVET2 төслийн ахлах мэргэжилтэн Б.Болор төслийн хэрэгжилт, олон улсын туршлагын талаар, төслийн мэргэжилтэн Д.Одбаяр хөдөлмөрийн зах зээлийн эрэлтэд нийцсэн мэргэжилтэй ажилтан бэлтгэх хосмог сургалтын давуу тал, чанарын асуудлаар мэдээлэл өглөө.

МҮХАҮТ-ын Бизнес академийн дарга Д.Бямбадорж хөдөө аж ахуйн салбарын хөдөлмөрийн зах зээлийн өнөөгийн нөхцөл байдал, хөдөлмөр эрхлэлтийг дэмжих боломжийн талаар илтгэл тавьсан бол тус академийн ахлах мэргэжилтэн

С.Оюунсүрэн хосмог сургалтын тогтолцоонд МҮХАҮТ, мэргэжлийн зөвлөл, сургалтын байгууллага болон аж ахуйн нэгжүүдийн оролцоо, хүлээх үүрэг, тавигдах шаардлагыг танилцууллаа.

Түүнчлэн хосмог сургалтыг дотоодод хэрэгжүүлж буй сайн туршлагаас Зүүнхараагийн STREAM төслийн хүрээнд хэрэгжүүлсэн ажил болон “Оргио” компанийн туршлагыг хуваалцаж, аж ахуйн нэгжүүд сургалтын үйл явцад оролцох, ажлын байран дээр дадлагажуулах боломжийн талаар хэлэлцэв.

Өдөрлөгийн үргэлжлэлд оролцогчид бүлгийн хэлэлцүүлэг өрнүүлж, хөдөө аж ахуйн салбарт нэн тэргүүнд шаардлагатай байгаа мэргэжил, ур чадвар, тэдгээрээр хосмог сургалт зохион байгуулах боломж, ажил олгогчдын бэлэн байдлыг тодорхойлон санал солилцлоо. Хэлэлцүүлгийн үр дүнд салбарын хөдөлмөрийн зах зээлийн өнөөгийн болон цаашдын эрэлт хэрэгцээнд үндэслэн шаардлагатай хүний нөөц, мэргэжлийн чиглэлийг нарийвчлах, сургалтын байгууллага болон ажил олгогчдын хамтын ажиллагааг бэхжүүлэх, үйлдвэрлэлийн дадлагын орчин, боломжийг бүрдүүлэх чиглэлээр хамтран ажиллах шаардлагатайг онцоллоо.

Хосмог сургалт нь суралцагч онолын мэдлэгээ боловсролын байгууллагад эзэмшихийн зэрэгцээ аж ахуйн нэгж, үйлдвэрлэлийн орчинд практик ур чадвар эзэмших боломж олгодог бөгөөд хөдөлмөрийн зах зээлийн бодит эрэлтэд нийцсэн мэргэжилтэй ажилтан бэлтгэх чухал тогтолцоо юм.
