МҮХАҮТ-ЫН ЕРӨНХИЙ НАРИЙН БИЧГИЙН ДАРГА Б.САРУУЛ АЗИЙН ХӨГЖЛИЙН БАНК (АХБ)-НЫ ТӨЛӨӨЛӨЛТЭЙ УУЛЗАЛТ ХИЙЛЭЭ

МҮХАҮТ-ын Ерөнхий нарийн бичгийн дарга Б.Саруул АХБ-ны Улс хариуцсан ахлах эдийн засагч Мартино Пелли болон бусад төлөөлөлтэй уулзаж, цаашдын хамтын ажиллагааны боломжуудын талаар хэлэлцэв.

Азийн Хөгжлийн Банктай хамтын ажиллагааны хүрээнд бизнесийн маргаан шийдвэрлэх чиглэлээр холбогдох байгууллагуудын хамтын ажиллагааг өргөжүүлэх талаар санал солилцов. Мөн ойрын хугацаанд зохион байгуулагдах төлөөлөгчдийн айлчлал, бизнес ба хөрөнгө оруулалтын арга хэмжээнүүдэд МҮХАҮТ идэвхтэй хамтран ажиллах боломжийг хэлэлцэж, хувийн хэвшлийн оролцоог нэмэгдүүлэхэд чиглэсэн үйл ажиллагааг дэмжихээр тохиролцов. Түүнчлэн бизнесийн орчныг сайжруулах, аж ахуйн нэгжүүдэд чиглэсэн мэдээлэл солилцоог тогтмолжуулахад талууд цаашид нягт хамтран ажиллах, Төв Азийн бүс нутгийн эдийн засгийн хамтын ажиллагааны хөтөлбөр (CAREC)-ийн хүрээнд бүс нутгийн худалдаа, хөрөнгө оруулалтыг дэмжих, хувийн хэвшлийн оролцоог нэмэгдүүлэх чиглэлд хамтын ажиллагааг өргөжүүлэхээр талууд санал нэгдэв. Энэхүү хөтөлбөр нь гишүүн орнуудын эдийн засгийн уялдаа холбоог бэхжүүлэх, тогтвортой өсөлтийг хангахад чиглэдэг юм.