ИТАЛИ МОНГОЛЫН БИЗНЕС ФОРУМААР 2 УЛСЫН ХУДАЛДАА ХӨРӨНГӨ ОРУУЛАЛТЫН ТАЛААР ХЭЛЭЛЦЛЭЭ
Итали Монголын бизнес форум эхэллээ. Форумыг нээж үг хэлсэн оролцогчид хоёр талын эдийн засгийн харилцааг гүнзгийрүүлэх, хамтын ажиллагааг өргөжүүлэх ач холбогдлыг онцлов.
Итали Улсын Гадаад харилцаа, олон улсын хамтын ажиллагааны яамны Хөтөлбөр, сурталчилгаа хариуцсан газрын захирал Мауро Баттокки форум нь талуудын бизнесийн харилцааг бэхжүүлэх чухал платформ болохыг тэмдэглэж, МУ-ын Гадаад харилцааны яамны Олон улсын худалдаа, эдийн засгийн хэлтсийн захирал Г.Өлзийсайхан хоёр талын худалдаа, хөрөнгө оруулалтын боломжийг өргөжүүлэхэд форумын ач холбогдлыг онцоллоо.
Мөн Confindustria-ийн Дэд ерөнхийлөгч Барбара Чиммино, Итали компанийн туршлага, инновацийг Монголын бизнесийн салбарт нэвтрүүлэх боломжийг дурдав. Монголын Үндэсний Худалдаа Аж үйлдвэрийн Танхимын Ерөнхий нарийн бичгийн дарга Б.Саруул энэхүү форум нь Монголын бизнесийн салбарын тэргүүлэх компаниудыг гадаад зах зээлтэй холбох, хамтын ажиллагааг бэхжүүлэх платформ болж байгааг тэмдэглэлээ.
Форум текстиль, хувцас, арьс шир, хөдөө аж ахуй, хүнсний үйлдвэрлэл болон бусад тэргүүлэх салбарын хуралдаанаар үргэлжиллээ.
