БНМАУ-ын Худалдааны танхимын оюуны өмчийн үйлчилгээний эхлэл
Монгол Улсад оюуны өмчийн итгэмжлэгдсэн төлөөллийн үйл ажиллагаа үүсч хөгжсөн түүхэн эхлэл Монголын Үндэсний Худалдаа Аж Үйлдвэрийн Танхимтай салшгүй холбоотой байдаг.
БНМАУ-ын Сайд нарын Зөвлөлийн 1967 оны 367 дугаар тогтоолоор "Барааны тэмдэгт бүртгэх дүрэм" болон 1970 оны 415 дугаар тогтоолоор "Шинэ бүтээлийг бүртгэх дүрэм" тус тус батлагдаж, БНМАУ-д оюуны өмчийн эрхийн хамгаалалт хийхээр хандаж байсан гадаадын пүүс компанийн баримт сэлтийг орчуулж боловсруулан тухайн үеийн шинэ бүтээл, оновчтой санаачлагын ажлыг удирдах Улсын комисст хүлээлгэн өгч төлөөлөн зуучлах ажлыг БНМАУ-ын Худалдааны танхим (одоогийн МҮХАҮТ) гардан хийж байв.
1970-аад оны эхэн үед БНМАУ-ын Шинжлэх ухаан техникийн улсын хороо оюуны өмчийн салбарын мэргэшсэн боловсон хүчнийг бэлтгэх зорилгоор ЗХУ-ын Москва хот дахь Патентын ажилтны мэргэжил дээшлүүлэх институт болон Патентын ажилтны дээд курст мэргэжилтнүүдийг илгээсний дунд Худалдааны танхимын анхны патентын мэргэжилтэн Г.Доёд, түүний халааг авсан Г.Баярт, Ц.Янсанжав нар суралцаж төгссөн байдаг. Өдгөө МҮХАҮТ нь оюуны өмчийн салбар дах үе үеийн боловсон хүчнийг мэргэшүүлэн бэлтгэж, залгамж холбоог бэхжүүлэн, салбарын эрх зүйн орчныг боловсронгуй болгох, бизнес эрхлэгчдэд оюуны өмчийн мэдлэгийг түгээхэд хувь нэмрээ оруулсаар ирсэн билээ.
Худалдаа, аж үйлдвэрийн танхимын тухай хуульд заасан бүрэн эрхийн хүрээнд үзүүлж буй үндсэн үйлчилгээнүүдийн нэг болох оюуны өмчийн итгэмжлэгдсэн төлөөллийн үйл ажиллагааг өнөөдөр МҮХАҮТ-ын Патент, барааны тэмдэг, газар зүйн заалтын газар залгамжлан явуулж байна.
Монголын Үндэсний Худалдаа Аж Үйлдвэрийн Танхимын 65 жилийн ойг тохиолдуулан Танхимын хөгжил, амжилтад үнэтэй хувь нэмрээ оруулсан үе үеийн зүтгэлтнүүд, үнэнч гишүүд болон нэг зорилгын төлөө хамтран ажиллаж ирсэн түнш байгууллагууддаа талархан мэндчилье!
Нийтлэл бичсэн: С.Дүүрэнжаргал
Оюуны өмчийн итгэмжлэгдсэн төлөөлөгч
Тусгай зөвшөөрлийн дугаар №068
МҮХАҮТ-ын Патент, барааны тэмдэг, газар зүйн заалтын газар
Утас: 77277070-8
Email: patenttmbur@mongolchamber.mn
