МОНГОЛ, ХЯТАД, СОЛОНГОСЫН БИЗНЕСИЙН БАЙГУУЛЛАГУУДЫН ГУРВАН ТАЛТ УУЛЗАЛТ БОЛОВ
МҮХАҮТ-ын Ерөнхийлөгч Б.Лхагважав БНХАУ-д хийж буй ажлын айлчлалынхаа хүрээнд БНХАУ-ын Үндэстний худалдааг дэмжих нийгэмлэг (CCPNT) болон БНСУ-ын "Global Management Support Association" (GMSA)-ийн төлөөлөгчидтэй гурван талт хамтарсан уулзалт зохион байгууллаа. Уулзалтаар талууд Монгол, Хятад, Солонгос улсын бизнесийн байгууллагуудын хамтын ажиллагааг өргөжүүлэх, худалдаа, хөрөнгө оруулалтын урсгалыг нэмэгдүүлэх, аж ахуйн нэгжүүдийн түншлэлийг бэхжүүлэх талаар дэлгэрэнгүй санал солилцсон юм. Мөн цаашид хамтарсан арга хэмжээнүүдийг тогтмол зохион байгуулах боломжуудыг хэлэлцэв.
Энэхүү уулзалтын үеэр талууд Монгол Улсын нийслэл Улаанбаатар хотноо Монгол–БНСУ–БНХАУ-ын хамтарсан бизнес уулзалт, хөрөнгө оруулалтын форум зохион байгуулахаар санал нэгдэж, уг арга хэмжээг ойрын хугацаанд хамтран хэрэгжүүлэхээр тохиролцлоо. Энэхүү форум нь гурван улсын бизнес эрхлэгчид, хөрөнгө оруулагчид болон төр, хувийн хэвшлийн байгууллагуудын түншлэлийг шинэ шатанд гаргах, харилцан ашигтай төсөл, хөтөлбөрүүдийг дэмжихэд чухал ач холбогдолтой болохыг уулзалтад оролцогчид онцлон тэмдэглэв.
Үүнээс гадна Монгол Улс болон БНХАУ, БНСУ-ын хойд бүсийн аймаг, муж, хотуудын хооронд худалдаа, хөрөнгө оруулалт, үйлдвэрлэл, логистик, аялал жуулчлал, жижиг, дунд үйлдвэрийн салбарт хамтран ажиллах өргөн боломж байгааг талууд тэмдэглэсэн юм. Иймд эдгээр боломжуудыг зөвхөн яриа хэлэлцээ төдийхөн бус, бодит ажил хэрэг, хөрөнгө оруулалтын төсөл болгон хөгжүүлэх чиглэлээр нягт хамтран ажиллахаар санал нэгдлээ. Уулзалтын төгсгөлд талууд бүс нутгийн эдийн засгийн хамтын ажиллагааг бэхжүүлэх, бизнесийн таатай орчныг бүрдүүлэх, гурван улсын аж ахуйн нэгжүүдийн харилцааг шинэ түвшинд хүргэх зорилгоор цаашид тогтмол харилцаа холбоотой ажиллахаар тохиролцсоноор уулзалт өндөрлөв.
