“WIPO GLOBAL AWARDS 2026” – ШАЛГАРУУЛАЛТЫН ТОВЧ МЭДЭЭЛЭЛ
Дэлхийн Оюуны Өмчийн Байгууллага-аас жил бүр уламжлал болгон зохион байгуулдаг “WIPO Global Awards 2026” олон улсын шалгаруулалт эхэллээ. Энэхүү нэр хүндтэй шагнал нь оюуны өмчийг зөвхөн эрхийн хамгаалалт төдий бус, бизнесийн стратеги, тогтвортой өсөлт болон нийгмийн сайн сайхны төлөө амжилттай ашиглаж буй дэлхийн өнцөг булан бүрийн стартап болон жижиг, дунд үйлдвэрлэл эрхлэгчдийг тодруулан алдаршуулах зорилготой юм.
2026 оны шалгаруулалт нь нийт 11 ялагчийг тодруулах бөгөөд үүнд эрүүл мэнд, хөдөө аж ахуй, байгаль орчин, бүтээлч үйлдвэрлэл болон мэдээлэл холбооны технологийн салбарын 10 шилдэг аж ахуйн нэгжээс гадна энэ жилийн онцлох чиглэл болох спортын салбарт үйл ажиллагаа явуулж буй ЖДҮ-үүдэд зориулсан тусгай шагнал багтаж байна. Мөн эмэгтэй болон залуу бизнес эрхлэгчдийг дэмжих нэрэмжит шагналууд олгогдохоороо онцлогтой.
Шалгаруулалтын үндсэн шалгуурт тухайн байгууллагын оюуны өмчийн стратеги, түүнийг арилжаалах төлөвлөгөө, дотоод соёл болон НҮБ-ын Тогтвортой хөгжлийн зорилтуудад оруулж буй бодит хувь нэмэр зэргийг голчлон үзнэ. Ялагч болсноор WIPO болон НҮБ-ын дэлхийн хэмжээний сүлжээгээр дамжуулан олон улсад танигдах, зургаан сарын хугацаатай мэргэжлийн менторшип хөтөлбөрт хамрагдах, боломжит хөрөнгө оруулагчидтай холбогдох зэрэг ховор боломжуудыг эдлэхээс гадна Швейцарын Женев хотноо болох шагнал гардуулах ёслолд оролцох эрхтэй болох юм.
Уралдааны бүртгэл 2026 оны 1 дүгээр сарын 15-наас эхлэн 3 дугаар сарын 31-нийг дуустал үргэлжлэх бөгөөд WIPO-гийн гишүүн 194 улсын стартап, ЖДҮ-үүд өөрийн хүсэлтийг Англи, Орос, Хятад зэрэг зургаан хэлний аль нэгийг сонгон илгээх боломжтой. 2026 оны шалгаруулалт нь “Оюуны өмч ба спорт” гэсэн уриа дор зохион байгуулагдаж байгаа тул энэ чиглэлээр инновац нэвтрүүлж буй бизнес эрхлэгчдийг идэвхтэй оролцохыг урьж байна.
ДЭЛГЭРЭНГҮЙ МЭДЭЭЛЭЛ БОЛОН БҮРТГЭЛИЙН ХОЛБООСЫГ WIPO-ГИЙН АЛБАН ЁСНЫ ВЭБ САЙТААС (HTTPS://WWW.WIPO.INT/EN/WEB/AWARDS/GLOBAL) АВАХ БОЛОМЖТОЙ.
