“ЦАХИМ ЭДИЙН ЗАСАГ ДАХЬ ЭМЭГТЭЙ ЭКСПОРТЛОГЧДЫГ ДЭМЖИХ” ТӨСЛИЙН ХҮРЭЭНД ҮНДЭСНИЙ ЗӨВЛӨЛДӨХ ХОРООНЫ АНХДУГААР ХУРАЛ ЗОХИОН БАЙГУУЛАГДЛАА

Монголын Үндэсний Худалдаа Аж Үйлдвэрийн Танхим нь Дэлхийн худалдааны байгууллага болон Олон улсын худалдааны төвтэй хамтран хэрэгжүүлж буй “Цахим эдийн засаг дахь эмэгтэй экспортлогчдыг дэмжих” (WEIDE) төслийн хүрээнд Үндэсний зөвлөлдөх хороог байгуулж, анхдугаар хурлыг амжилттай зохион байгууллаа.

Тус зөвлөлдөх хороо нь Монгол Улсад эмэгтэй бизнес эрхлэгчдийн цахим худалдаа, экспортын оролцоог нэмэгдүүлэх, бодлого болон санхүүгийн дэмжлэгийн уялдаа холбоог сайжруулах, төр-хувийн хэвшлийн хамтын ажиллагааг бэхжүүлэх зорилготой юм.

Үндэсний зөвлөлдөх хорооны бүрэлдэхүүнд  Хөрөнгө оруулалт, худалдааны газрын захирал Б.Зандан, МҮХАҮТ-ын ЕНБДарга Б.Саруул, “Хүнсний хувьсал” үндэсний хөтөлбөрийн зөвлөх Ч.Даваабаяр, Голомт банкны Жижиг, дунд банкны газрын захирал Ц.Байгалмаа, Хаан Банкны Жижиг, дунд бизнесийн банкны менежер Б.Рэгзэдмаа, Богд банкны Гүйцэтгэх захирал Г.Саруул  зэрэг байгууллагуудын төлөөлөл байдаг. 

Анхдугаар зөвлөлдөх уулзалтын үеэр төслийн зорилго, хэрэгжилтийн явц, Монголын эмэгтэй экспортлогчдод тулгарч буй цахим худалдаа болон олон улсын зах зээлд нэвтрэхэд үүсэж буй сорилтууд, санхүүжилтийн хүртээмж, чадавх бэхжүүлэх хэрэгцээ зэрэг асуудлуудыг хэлэлцэж, цаашдын хамтын ажиллагааны чиглэлийг тодорхойлов. Цаашид Үндэсний зөвлөлдөх хороо нь эмэгтэй бизнес эрхлэгчдийг цахим эдийн засагт идэвхтэй оролцуулах, экспортын боломжийг нэмэгдүүлэхэд чиглэсэн бодит санал, зөвлөмжийг боловсруулан хэрэгжүүлэхэд чухал үүрэг гүйцэтгэх юм.