ХҮНСНИЙ ЛАБОРАТОРИУДЫН САЛБАРЫН ХЭЛЭЛЦҮҮЛЭГ ЗОХИОН БАЙГУУЛАГДЛАА
"Хүнсний лабораториудын тулгамдсан асуудал, хууль эрх зүйн орчны сайжруулалт" сэдэвт салбарын хэлэлцүүлэг амжилттай болж өнгөрлөө. Тус хэлэлцүүлэг нь хүнсний лабораториудын өнөөгийн нөхцөл байдалд дүн шинжилгээ хийх, тулгамдаж буй асуудлуудыг хэлэлцэж, салбарын нэгдсэн санал боловсруулах тал дээр хэлэлцүүлэг өрнүүллээ.
Хэлэлцүүлгийн үеэр Инно хими лаб ХХК Гүйцэтгэх захирал, Итгэмжлэгдсэн лабораториудын зөвлөлийн дарга М.Энхмандах салбарын тулгамдаж буй асуудлуудыг шийдвэрлэхэд лабораториудын хамтын ажиллагаа болон эрх зүйн шинэчлэл нэн тэргүүний зорилт болохыг тэмдэглэлээ.
Тэрээр "Хүнсний аюулгүй байдлыг хангах гинжин хэлхээний хамгийн чухал зангилаа нь лабораторийн хяналт юм. Өнөөдөр бидэнд тоног төхөөрөмжийн шинэчлэлээс гадна шинжилгээний арга зүйг олон улсын стандартад нийцүүлэх, мэргэшсэн боловсон хүчнийг тогтвортой ажиллуулах бодит шаардлага тулгарч байна. Цаашид хүнсний лабораториудын бие даасан байдлыг хууль эрх зүйн хүрээнд баталгаажуулж, төр-хувийн хэвшлийн түншлэлийг бэхжүүлснээр бид дотоодын төдийгүй экспортын бүтээгдэхүүний чанарыг шинэ шатанд гаргах боломжтой" хэмээн онцлов. Мөн хэлэлцүүлгээс гарсан нэгдсэн санал, зөвлөмжүүдийг холбогдох хуулийн төсөл, бодлогын баримт бичигт тусгуулахаар шийдвэр гаргах түвшний байгууллагуудад хүргүүлэхээ илэрхийллээ.
Хэлэлцүүлгийн үеэр Монгол Улсад ISO/IEC 17025 стандарт болон олон улсын Codex Alimentarius, FAO/WHO-ийн шаардлагад нийцсэн, шинжилгээний үр дүн нь дэлхийн түвшинд хүлээн зөвшөөрөгдөх хүнсний аюулгүй байдлын үндэсний лабораторийн нэгдсэн тогтолцоог бүрдүүлэх алсын харааг танилцууллаа. Үүний хүрээнд лабораторийн үндэсний сүлжээ (National Laboratory Network) болон мэдээллийн нэгдсэн систем (National LIMS) байгуулах, хүний нөөцийн чадавхыг олон улсын түвшинд хүргэх зэрэг стратегийн зорилтуудыг тодорхойлов.
Хэлэлцүүлгийн хаалтад МҮХАҮТ-ын ГСТАХГ-ын дарга М.Очирбат оролцож, Танхимын дэргэд салбар бүрийн төлөөллийг багтаасан 18 зөвлөл идэвхтэй үйл ажиллагаа явуулж байгааг онцлоод эдгээр зөвлөлүүд нь төр, хувийн хэвшлийн гүүр болж, тулгамдаж буй асуудлуудыг бодлогын түвшинд шийдвэрлэхэд чухал үүрэг гүйцэтгэдгийг тэмдэглээд, хүнсний лабораториудын чадавхыг сайжруулах санал санаачилгыг танхимын зүгээс бүх талаар дэмжин ажиллахаа илэрхийллээ.
